Testi i ADN-së ka çuar në zbulimin e një prej vrasësve famëkeq në Francë të njohur si “Le Grêlé”. Ai kërkohej nga policia franceze prej 35 vitesh pas vrasjeve dhe përdhunimeve që tronditën Parisin midis viteve 1986 dhe 1994. Një-ish oficer policie, 59 vjeç, i njohur si François Vérove, ka rrëfyer në një letër para se të vdiste se ai ishte vrasësi famkeq. Pas vdekjes së tij, analizat e ADN kanë treguar se përputhej me ADN e vrasësit serial.
“Ne kurrë nuk do t’i dimë të gjitha krimet e kryera nga Le Grêlé,” tha Didier Saban, një avokat që përfaqëson familjet e viktimave.
Ndër krimet tronditëse që ai ka kryer është vrasja e 11-vjeçares Cécile Bloch. Ajo u raportua e zhdukur pasi nuk u paraqit në shkollë në Paris në 1986. Vérove është i lidhur me katër vrasje dhe gjashtë përdhunime, por Saban tha se padyshim që kishte edhe më shumë, dhe se vdekja e tij kishte lënë shumë familje pa përgjigje, sipas BBC.
Burri 59-vjeçar, i gjetur i vdekur, kishte qenë xhandar para se të bëhej oficer policie dhe më vonë doli në pension. Ai u thirr nga policia më 24 shtator për të dhënë një mostër të ADN-së pesë ditë më vonë. Gruaja e tij raportoi se ai ishte zhdukur më 27 shtator. Trupi i tij u zbulua në një apartament me qira në Grau-du-Roi në bregdetin Mesdhe, së bashku me një shënim vetëvrasjeje. Prokurorët thonë se ADN -ja e tij përputhej me provat e gjetura në disa skena krimi.
Përmbajtja e letrës nuk është konfirmuar, por raportet franceze thonë se ai rrëfeu se kishte përjetuar “impulse të mëparshme” për të kryer vrasjet, ndërsa tha se që atëherë “ishte mbledhur”. Ai me sa duket pranoi vrasjet pa dhënë detaje mbi viktimat ose rrethanat.
