Kreu i Shoqatës së Invalidëve Para-Tetraplegjikë, Bajram Tirana, ka dhënë sot një lajm të mirë për kategorinë që ai përfaqëson. Ai tha se kanë arritur në një marrëveshje me Ministrin e Financave dhe atë të Shëndetësisë. Tirana tregoi se përfaqësues nga shoqata zhvilluan sot një takim me ministren Delina Ibrahimaj dhe Ogerta Manastirliu, që sipas tij dolën në një marrëveshje në favor të tetraplegjikëve, pasi monistet pranuan kërkesat e tyre. Sipas tij, kërkesat bazë ishin subvencionimi i energjisë elektrike dhe pagesat për kujdestarët, si dhe mbulimi i kostove të higjienës.
“U fokusua te tre pikat më emergjente siç është energjia elektrike, pagesa e kujdestarit dhe paketa higjienike që ka kosto shumë marramendëse. Për kujdestarinë dhe paketën higjienike me 20 të këtij muaji do ngrihen tre komisione ku do bëhet vlerësimi i para dhe tetraplegjikëve dhe pastaj gradualisht do fillojë financimi i tyre sipas diskutimit që bëmë sot“, tha ai.
Më tutje, Bajram Tirana u shpreh optimist për plotësimin e kërkesave, ku si afat i është lënë një periudhë nga 3 deri në 6 muaj. “Shpresojmë që këto komisione të mblidhen sa më shpejt, do jemi dhe ne pjesë e komisioneve. Për paketën higjienike dhe kujdestarinë u la 3-6 muaj për komisionet. Do fillojë me Tiranën dhe pastaj do shpërndahen në rrethe“, tha ai. Kujtojmë se, para dhe tetraplegjikët kërkojnë rritje të pagesave për trajtimin e tyre, rikthimin e pagesës për energjinë elektrike, pagën për kujdestarinë, si dhe shlyerjen e detyrimeve të prapambetura nga qeveria.
Discussion about this post