Teuta ka marrë tre pikë të arta kundër Kukësit, pasi triumfoi me rezultatin e thellë 4-1. Durrsakët kishin shumë nevojë për këtë triumf dhe tashmë numërojnë 5 pikë më shumë se Egnatia, që nesër përballet me Kastriotin në transfertë.
Kampionët në fuqi e nisën ndeshjen në mënyrë fantastike, duke shënuar që në minutën e 11-të. Pas një goditjeje këndi, Rubin Hebaj me kokë shtangu portierin Xhika dhe kaloi në epërsi “Djemtë e Detit”.
Milunovic për miqtë u mundua të rrezikonte, ndërsa Kotobelli i “trembi” verilindorët në minutën e 27-të. Më pas radhën e kishte Gjelprim Taipi, i cili vuri në provë portierin Qirko. Nuk vonoi goli dhe ishte Emiljano Musta që ndëshkoi ish-skuadrën e tij.
Anësori nga Elbasani goditi fillimisht shtyllën dhe në tentativën e dytë nuk fali. 45 minutat e para të ndeshjes përfunduan 1-1. Fraksioni i dytë i lojës nisi me gol dhe ishte Teuta ekipi që festoi, pasi Hebaj nuk fali pas një pasimi të Dacit.
Vila iu afrua edhe golit të tretë me një diagonale të fortë. Durrsakët e dinin se llogaritë nuk ishin mbyllur dhe Daci ishte ai që tronditi skuadrën që ka kartonin e tij, duke shënuar me një parabolë pas një kundërsulmi perfekt.
Në fund pati edhe një penallti, që Hebaj e ktheu në gol dhe mori topin në shtëpi dhe u bë hero për Teutën në një sfidë që ishte padyshim një finale për kampionët në fuqi. Kukësi ndërkohë ka humbur vendin e tretë në kampionat.
Discussion about this post