Kreu i Partisë Demokratike, Lulzim Basha iu është përgjigjur të gjithë kritikëve të PD, që kanë deklaruar se nuk do shkojnë në asnjë nga Kuvendet e thirrur nga ai apo ish-kryeministri Berisha, përfshirë këtu edhe deputeti Tomor Alizoti.
Në një intervistë për News 24, Basha iu përgjigj Alizotit duke i thënë se politika është angazhim për t’i shërbyer qytetarëve, dhe jo interesave të tij personale.
“Angazhimi politik është angazhim, unë nuk dua të merrem me emra të përveçëm, por angazhimi nuk është vetëm privilegj. Në fakt jo vetëm në Shqipëri, por kudo angazhimi politik sjell mbi të gjitha sakrificë. Sigurisht nëse e shikon politikën si një mjet për t’i shërbyer njerëzve dhe jo për t’i shërbyer vetes. Kështu që, kushdo që futet apo merr një angazhim aktiv në politikë, duhet ta ketë të qartë se çdo ditë dhe çdo orë e jetës së tij apo të saj deri në fund të këtij angazhimi duhet të jetë në shërbim të njerëzve të cilëve iu ka kërkuar besimin dhe që presin prej atij apo prej asaj ta kthejë në një të mirë publike qoftë kjo në qeverisje apo në opozitë, sipas detyrave që secila palë ka në demokraci”, tha Basha.
I pyetur çfarë mendon për kuvendin e 18 dhjetorit, Basha tha se ai aktivitet nuk ka lidhje me PD, dhe aty sipas tij, do të marrin pjesë kundërshtarë që iu intereson përçarja e partisë.
Discussion about this post