Kryekëshilltari i presidentit të Turqisë, Rexhep Taip Erdogan, shqiptari Sabri Demiri ka deklaruar se Turqia ka qenë nga shtetet e para që ka ofruar garanci për lirimin e ish-Presidentit të Kosovës Hashim Thaçi nga paraburgimi në Hagë. Në një intervistë për KlanKosova, Demiri u shpreh se që në javët e para kur Thaçi u arrestua dhe shoqërua në Hagë, Turqia ka bërë gati dokumentet duke garantuar lirimin e Thaçit dhe mbajtjen e tij mysafir në Turqi. Për këtë, ai tha se kanë biseduar dhe me autoritetet në Kosovë, dhe kanë qenë të dyja shtetet të koordinuara në mënyrë që gjykimi i Thaçit të vazhdonte në liri, por që për këtë nuk morën një përgjigje nga Haga. Duke folur për mundësitë që Presidenti Erdogan të vizitojë Thaçin në Hagë, ai tha se nuk mund të japë garanci për këtë, ndërkohë që tregoi se gjatë një bisede telefonike që kishte bërë me ish-Presidentin e Kosovës, ky i fundit shprehu falenderimin për Erdogan.
Pjesë nga intervista:
Pyetje: Cili është qëndrimi i Turqisë për Gjykatës Speciale?
Demiri: Qëndrimi i Turqisë ka qenë gjithmonë kundër akuzimit të liderëve të zgjedhur nga populli në mënyrë demokratike. Por ne nuk mund të përzihemi gjatë procesit gjyqësor. Ne kemi dërguar garanci në Hagë që nëse bie një vendim që gjyqi të vazhdojë në liri të Thaçit ta kemi mysafir në Turqi.
Pyetje: Pra ju keni garantuar për lirimin dhe gjykimin e Thaçit në liri. Cila ka qenë përgjigja e tyre?
Demiri: Prej tyre nuk kemi marrë një përgjigje konkrete. Kjo ka qenë në fillim, dy-tre muaj pasi filloi procesi atëherë. Ishin disa shtete që e shprehën këtë dëshirë, ne ishim nga të parët që shprehëm këtë. Dhe filluam me Minisrinë e Jashtme me kërkesën dhe e dorëzuam atë. Nuk mund të them për datë konkrete, por ishim një nga shtetet e para që e ofruan këtë.
Pyetje: A ka pasur bashkëpunim në këtë proces me autoritetet kosovare. Duke qene se keni ofruar garanci për kreun e shtetit.
Demiri: Po, kemi pasur kontakte me institucionet e Kosovës dhe kanë qenë të informuar në Kosovë të gjithë.
Pyetje: Cila ka qenë ndihma e Kosovës në këtë proces?
Demiri: Nuk mund të them diçka të saktë të lidhur me këtë.
Pyetje: Komunikimi me kë ka qenë?
Demiri: Komunikimi ka qenë me Ministrinë e Jashtme, për shkak se unë kam ndjekur në momentin që kam marrë lejen nga President në lidhje me këtë kërkesë. Dhe më pas është marrë Ministria e Drejtësisë dhe Ministria e Jashtme.
Pyetje: Sa janë gjasat që Erdogan të viziojë ish-Presidentin Thaçi në Hagë?
Demiri: Nuk mund të them për këtë.
Pyetje: A ka pasur ndonjë komunikim direkt me Thaçin, nga presidenca apo nga Presidenti Erdogan?
Demiri: Ka pasur një telefonat, por e ka pasur me mua dhe ka shprehur dëshirën që ta përshëndes dhe falenderojë Presidentin Erdogan.
Thaçi dhe të tjerët ka mbi dy vite që po mbahen në qendrën e paraburgimit në Hagë. Mbi ta rëndojnë akuzat dhe pretendimet e Prokurorisë Speciale për krime lufte, ndalimit të paligjshëm ose arbitrar, trajtimit mizor, torturës dhe vrasjes së paligjshme dhe krimet kundër njerëzimit të burgosjes, akteve të tjera çnjerëzore, torturës, vrasjes së paligjshme, zhdukjes me forcë të personave dhe përndjekjes.
Discussion about this post