Pamje shqetësuese kanë shoqëruar festën e Shën Mërisë në Lagunën e Nartës, ku një nga perlat natyrore të Vlorës është në gjendje alarmante. Pjesa më e madhe e sipërfaqes së lagunës është tharë, duke lënë pas një peizazh të zymtë e të trishtuar, shumë larg asaj bukurie që kjo zonë ka ofruar ndër vite për banorët dhe vizitorët.
Tharja e ujërave ka ekspozuar fundin e lagunës, duke humbur reflektimin karakteristik dhe gjallërinë e saj, ndërsa aroma e rëndë dhe mungesa e freskisë natyrore kanë krijuar një atmosferë të zymtë në mes të festës.
Ky ndryshim i papritur dhe dramatik jo vetëm që e zbeh magjinë e një prej pikave më të rëndësishme turistike dhe kulturore të rajonit, por përbën edhe një kërcënim të drejtpërdrejtë për biodiversitetin.
Gjallesat ujore, si peshqit, molusqet dhe shpendët që ushqehen në këtë ekosistem, rrezikojnë të humbasin habitatin e tyre, duke prishur një zinxhir jetësor që është zhvilluar natyrshëm për shekuj. Ekspertët paralajmërojnë se një tharje e tillë mund të ketë pasoja afatgjata, jo vetëm për ekosistemin, por edhe për aktivitetet ekonomike të zonës, si peshkimi dhe turizmi.
Banorë të zonës dhe vizitorë të shumtë, të mbledhur për të festuar Shën Mërinë, nuk kanë mundur të fshehin zhgënjimin e tyre teksa kanë parë nga afër këtë realitet të hidhur. Shumë prej tyre kërkojnë ndërhyrje të menjëhershme nga institucionet për të hetuar shkaqet e tharjes dhe për të marrë masa urgjente për rikthimin e jetës në lagunë. /Report Tv
Discussion about this post