Thanë se qëlluan grabitësit, në pranga babë e bir në Pezë Helmës

Zbardhet dinamika e ngjarjes së mbrëmjes së të enjtes në Pezë Helmës.

Policia ka arrestuar dy persona lidhur me të shtënat me armë zjarri të regjistruar mbrëmjen e së enjtes. Sipas informacioneve, në pranga kanë rënë babë e bir, të cilët njoftuan për të shtënat.

Fillimisht është njoftuar policia, e cila pasi mbërriti në vendin e ngjarjes, ka marrë dëshminë e denoncuesit, i cili ka pretenduar se 3 apo 4 ditë më herët kanë tentuar t’i grabisin shtëpinë, por kjo sipas burimeve të policisë akoma nuk është vërtetuar.

Mbrëmjen e djeshme denoncuesi ka pretenduar se ka parë një person të maskuar në oborrrin e shtëpisë. Menjëherë ka hyrë në shtëpi, ka marrë kallashnikovin që e ruante që prej ’97-ës dhe ka qëlluar 4-5 herë në ajër.

Sipas tij, personi me maskë që është larguar me shpejtësi i është kundërpërgjigjur me armë. Policia ka gjetur në vendngjarje vetëm gëzhojat që janë qëlluar nga kallashnikovi i tij, por jo gëzhoja të armëve të tjera.

Pas përfundimit të hetimeve paraprake, policia arrestoi babë e bir për armëmbajtje pa leje dhe veprime që pengojnë zbulimin e të vërtetës.