Thellohet tensioni në veri të Kosovës. Në ditën e 11 të vendosjes së reciprocitetit të targave, dogana e Jarinjës dhe Bërnjakun vijon të mbetet e bllokuar.
Ndërkohë forcat e KFOR-it, vijojnë të patrullojnë në pikën kufitare në Bërnjak.
Misioni paqeruajtës i Aleancës Veri-atlantike në Kosovë i ka shtuar patrullimet në rrugët e bllokuara në pikat kufitare Bërnjak dhe Jarinjë.
Deri tani është finalizuar vetëm një draft-dokument.
Delegacioni serb në bisedimet me Kosovën në Bruksel e ka përfunduar takimin me të dërguarin e Posaçëm të Bashkimit Evropian, Mirosllav Lajçak mirëpo nuk kanë dhënë përgjigje nëse e pranojnë draft dokumentin për zgjidhjen e çështjes së targave të automjeteve, e cila ka shkaktuar tension gjatë ditëve të fundit në veri të Kosovës.
Burime të Bashkimit Evropian bëjnë me dije se në Bruksel negociatat pritet të vazhdojnë edhe më 30 shtator.
Delegacioni serb udhëhiqet nga drejtori i Zyrës për Kosovën në Qeverinë e Serbisë, Petar Petkoviq.
