Xhaxhai i Aldi Ramës, 21-vjeçari që vrau veten pasi qëlloi për vdekje nënkomisarin Saimir Hoxha, është arrestuar nga policia pasi kishte thyer masën e arrestit shtëpiak.
Ditën e sotme Gjykata e Lezhës ka vendosur që ai të rikthehet sërish në burg, duke vendosur masën “arrest me burg”. Përballë gjykatës ai ka deklaruar se u largua pasi donte të vizitonte nipin e tij të cilin e kishte të shtruar në spital.
Baki Rama ishte lënë nga Gjykata në “arrest shtëpie” pasi ishte arrestuar më parë për tregti të lëndëve narkotike. Mungesa e tij u vu re në momentin kur policia ushtroi kontroll në banesë, ditën kur vdiq Aldi Rama. Dyshohet se familjarët i thanë policisë se ai kishte shkuar në Tiranë për të marrë trupin e pajetë të nipit.
Aldi Rama është autori i vrasjes së nënkomisarit Saimir Hoxha. I riu ndodhej në makinë me dy shokë kur u ndalua nga Hoxha dhe dy efektivë të tjerë të cilët po ktheheshin nga operacionin për asgjësimin e lëndëve narkotike në këtë zonë. Në momentin e ndalimit, Rama ka refuzuar kontrollin e Hoxhës ku qëlloi me dy plumba duke i marrë jetën.
Rama nuk ishte një person i panjohur për drejtësinë, pasi ishte arrestuar më parë për shpërndarje droge, ndërsa prindërit i kishte të divorcuar dhe jetonte me gjyshërit.
