Një qytetar ka kërkuar që të gjithë të dilnin në shesh për të protestuar e për të kërkuar drejtësi për vdekjen e Lear Kurtit. Ai tha se nëse të gjithë do të dilnin në shesh, do të kishte më shumë impakt e do të bëhej drejtësi. Sipas qytetarit, nëse nuk kërkohet sot drejtësi, pas Kurtit do ta kenë radhën edhe të rinj të tjerë.
“Nuk fola që në fillim sepse doja të shikoja nëse kemi të bëjmë me një protestë që mblidhen pesë veta apo do të mblidhemi vërtetë për të protestuar për këtë padrejtësi. Leari u vra nga Policia e Shtetit. Jemi këtu për të kërkuar llogari, dikush u vra padrejtësisht. Mos heshtni, mos u ndjeni komod në atë divanin e shtëpisë. Dilni dhe protestoni sepse po na vrasin me radhë, do vijnë edhe tek fëmijët tuaj,”- tha Kurti.
Lear Kurti humbi jetën pasi u shoqërua nga efektivët në komisariatin nr.3. Atij iu kërkua të ndalonte në orën 23:07 të mbrëmjes së 19 tetorit nga efektivët, në rrugën “Riza Çuka” në Laprakë, por vrapoi dhe u largua. Siç sqarohet në njoftimin e policisë, i riu është kapur pas ndjekjes, është dërguar në komisariat, ku ka shfaqur problemet e para shëndetësore. Fillimisht u aludua se i riu vuante nga epilepsia, më pas, në deklaratën zyrtare u tha se i riu kishte gëlltitur një qese me lëndë narkotike. kontradikta është në faktin që efektivët pretendojnë se ka ndërruar jetë në spital, ndërsa bluzat e bardha të Traumës thonë se Kurti ka mbërritur pa shenja jete në duart e tyre. Paraprakisht, nga hetimet e deri më tanishme, është deklaruar se në trupin e viktimës nuk kishte shenja dhune. Por për kryedemokratin Sali Berisha, Kurti u vra nga Policia dhe ngjarja po mundohet që të mbulohet ashtu si rasti i Klodian Rashës, 2 vite më parë, i cili u qëllua për vdekje nga një efektiv policie.
Discussion about this post