Kukësi vazhdon fazën përgatitore për sezonin e ri në Superiore dhe sinjalet që po jep skuadra e drejtuar nga Rraman Hallaçi nuk janë ndër më optimistet e mundshme.
Pas barazimit ndaj Elbasanit në miqësore vetëm pak ditë më parë, skuadra verilindore është mposhtur sot në miqësore nga një tjetër ekip i Kategorisë së Parë, Vora.
Hallaçi kishte hedhur në fushë një rreshtim ku ishin pjesa më e madhe e futbollistëve që do të përbëjnë bazën e skuadrës, pa harruar edhe afrimet e fundit në merkatos.
Por ka qenë Vora ajo që në fund ka dalë fitimtare, me golin e Tafës në pjesën e dytë të ndeshjes. Një rezultat që i jep më shumë entuziazëm ekipit të Kategorisë së Parë, që nis edicionin me ambicie për të synuar një vend mes skuadrave që pretendojnë Superioren.
Ndërsa për Kukësin, sinjalet e deritanishme janë ato të një skuadre e cila do të jetë shumë larg pretendimeve me të cilat kishte mësuar në vitet e kaluara.
Discussion about this post