Kreu i shtetit, Ilir Meta, ka shpërthyer me fjalor rruge, aspak i denjë për një President Republike, duke sharë e ofenduar kreun e opozitës gjatë një takimi në ambientet e Hotel Rogner.
Sipas dëshmitarëve okularë, Presidenti Ilir Meta ka kapur për krahu deputetin e Partisë Demokratike, Agron Gjekmarkaj, duke thënë fjalë të rënda për liderin e Partisë Demokratike, Lulzim Basha.
Meta është dëgjuar duke sharrë me fjalët: “Thuaji Lulit, se do ja q*…”, kanë qenë vetëm disa nga fjalët e përdorura nga presidenti Meta ndaj Lulzim Bashës.
Të gjitha të sharat dhe ofendimet në adresë të Lulzim Bashës, Meta i ka bërë me zë të lartë, duke bërë që të dëgjohet nga të gjithë të pranishmit në ambientet e hotelit.
Kjo situatë aspak normale për një President ka lënë të shtangur të pranishmit, të cilët kanë dëgjuar bisedën me tone të larta, ndërkohë që vjen pas një ftohje të dukshme mes partisë së drejtuar nga bashkëshortja e tij, LSI dhe Partisë Demokratike.
Por, krisja e marrëdhënieve mes kreut të opozitës dhe Metës duket se vjen pas zgjedhjeve të 25 prillit. Vetëm pak javë më parë, në një nga fjalimet në parlament, Basha e përfshiu Presidentin në atë që ai e quan “Trekëndëshin e Bermudës” si shkaktarët e ngecjes së tranzicionit në Shqipëri, që janë Berisha, Rama dhe Meta.
Ndërsa Meta, në një intervistë për mediat iu përgjigj me katërkëndëshin e dështimeve të Bashës. Por duket se trinomi i përmendur nga Basha ka ndikuar aq shumë te kreu i shtetit, i cili ka dalë nga vetja, duke folur me një fjalor rruge në mes të dhjetëra personave.
Ditët e fundit kanë pasur shumë polemika në distancë mes liderit të PD-së dhe presidentit Ilir Meta, por të gjithë ngrenë pikëpyetje për këtë mllef kaq të madh të presidentit Meta ndaj Lulzim Bashës.
Vetëm një ditë më parë, kreu i shtetit hodhi akuza ndaj Bashës se i ishte lutur që mos të bëheshin zgjedhjet më 30 qershor, por më shumë duket se Meta ka dalë hapur në krah të Berishës për të luftuar Bashën, pasi siç vetë kreu i shtetit është shprehur më herët, ka një marrëdhënie të veçantë me doktorin.
Discussion about this post