Policia e Durrësit ka finalizuar operacionin policor të koduar “Refleksi”, i cili çoi në arrestimin e një 37-vjeçari nga Tirana, autor i disa vjedhjeve me thyerje të automjeteve në qytetin bregdetar.
Sipas njoftimit zyrtar të Policisë së Shtetit, i arrestuari, V. K., 37 vjeç, qarkullonte me biçikletë në lagje të ndryshme të Durrësit, thyen xhamat e automjeteve dhe vidhte sende personale, para dhe pajisje elektronike.
Më pas, ai përdorte automjetin e tij për të transportuar dhe fshehur sendet e vjedhura.
Gjatë operacionit, 37-vjeçari u kap në flagrancë teksa tentonte të vidhte një tjetër automjet
“Në vijim të punës për parandalimin e vjedhjeve, zbardhjen e atyre të ndodhura më parë, identifikimin dhe kapjen e autorëve, shërbimet e Komisariatit të Policisë Durrës, pas një pune të gjatë hetimore, bazuar edhe në informacionet e marra në rrugë operative dhe nga administrimi i pamjeve filmike, organizuan dhe finalizuan operacionin policor të koduar “Refleksi”.
Në kuadër të operacionit u bë kapja në flagrancë, në tentativë për të vjedhur në një automjet, dhe u vu në pranga shtetasi V. K., 37 vjeç, banues në Tiranë.
Nga veprimet hetimore ka rezultuar se ky shtetas është autor i disa vjedhjeve me thyerje të automjeteve, të ndodhura në lagjet nr. 6, 8 dhe 12 të qytetit të Durrësit.
Ky shtetas ka vjedhur në 5 automjete, në pronësi të shtetasve Xh. B., J. B., S. Q., L. K. dhe Xh. M., shuma parash, laptopë dhe sende të tjera personale të drejtuesve të këtyre automjeteve.
Në bashkëpunim me Prokurorinë vijojnë veprimet hetimore për zbardhjen dhe dokumentimin me prova ligjore edhe të disa vjedhjeve të tjera të ndodhura më parë, që dyshohet se janë kryer nga ky shtetas.”- njofton policia.
Discussion about this post