Opozita ka vijuar sot protestat para bashkisë së Tiranës, duke kërkuar dorëheqjen e kryetarit Erion Veliaj.
Nënkryetari i Këshillit Bashkiak të Tiranës, Dorjan Teliti në protestën e përjavshme përpara bashkisë së Tiranës është shprehur se nuk do ta mbyllin protestën derisa të jepet drejtësi për qytetarët e Tiranës.
Teliti deklaroi se sot qytetarët paguajnë ujin 44% më çmim të lartë, ndërsa nuk ka ujë, paguajnë taksat e arsimin dhe arsim nuk kanë.
“Tirana nuk është më mirë se më përpara dhe mendimi i tyre shkojnë vetëm të betonizimi dhe pastrimi i parave”, shtoi ai.
Ndërsa drejtuesi politik i PD për Tiranën, Belind Këlliçi theksoi se protestat nuk do të ndalen dhe se sërish të premten që vjen do të jenë para bashkisë.
Sekretari i Partisë së Lirisë, Tedi Blushi në fjalën e tij përpara protestuesve theksoi se duhet përshkallëzim.
“Ne jemi këtu për të mbrojtur të drejtat e banorëve të Tiranës. Përpara se të vrasë të ardhmen e të rinjëve ne duhet ti tregojmë vendin Veliajt dhe Dumanit të cilët duan të burgosin liderin e opozitës”, shtoi ai.
Klevis Balliu u shpreh se “Erion Veliaj vazhdon sot të jetë në krye të bashkisë së Tiranës, sepse këtu nuk ka drejtësi”.
Kreu i FRPD, Besart Xhaferri tha se është e turpshme se si një skenë krimi si e Bashkisë së Tiranës, nuk hetohet nga drejtësia shqiptare, duke e cilësuar një vendim të tillë, rekord tjetër turpi për hetuesinë.
Silva Caka preku planin për të ndërtuar te Stadiumi Dinamo.
“Erion Veliaj na erdhi (në Këshillin Bashkiak) me një projekt për gjoja rrjetëzimin e stadiumit Dinamo. Përpos gjithë problematikave që ka atje me pronat, ky zotëria do të ndërtojë atje disa kulla. Ashtu siç bëri tek stadiumi Qemal Stafa do të bëjë të njëjtën gjë edhe me një nga zonat më strategjike të Tiranës. Aty ai do të japë një qokë për atë që do të paguajë më shumë. Fatkeqësisht të njëjtin fat do të ketë edhe pallati i sportit Asllan Rusi. Erion Veliaj sigurisht që i piketon të gjitha këto zona dhe ua jep si qoka shokëve dhe njerëzve të tij”, tha ajo.
Lexo edhe:
Discussion about this post