Për duelin e mbrëmjes së sotme janë shitur plot 22 mijë bileta. Është një mbrëmje historike dhe shumë e rëndësishme për kuqezinjtë. Në rrugët e kryeqytetit kanë vërshuar tifozë nga mbarë trojet shqiptare por edhe diaspora. Festa ka nisur në Bulevardin “Dëshmorët e Kombit” në Tiranë.
Tifozët po këndojnë në kore teksa nuk kanë munguar edhe hedhjet e shashkave apo ndezjet e flakadanëve duke krijuar një atmosferë spektakolare. Tifozët e ardhur nga Kosova dhe Maqedonia e Veriut do të grumbullohen në të njëjtin sektor në stadium ku janë vendosur “Tifozat Kuq e Zi”. Ndeshja starton në orën 20:45 teksa sytë e të gjithë shqiptarëve do të fokusohen në këtë përballje historike.
