Pas përfundimit të ndeshjes mes Dinamo City dhe ekipit polak Jagiellonia, e zhvilluar mbrëmjen e së enjtes tek “Arena Kombëtare”, në afërsi të stadiumit ka ndodhur një incident ku një nga huliganët polakë është dhunuar nga një grup tifozësh shqiptarë.
Personi në fjalë identifikohet si njëri nga tifozët që disa orë më parë u filmua duke përdhosur bustin e Heroit Kombëtar, Gjergj Kastrioti Skënderbeu, në sheshin qendror të Tiranës.
Një grup i tifozëve polakë, kryenin gjeste të turpshme poshtë bustit të Skënderbeut dhe valëvitnin një flamur me mbishkrimin “Kosova është Serbi”.
Gjithashtu, qytetarë të shumtë denoncuan se tifozeria e Jagiellonias është e njohur për kore të tipit “Vritini Shqiptarët”, ndërsa janë përshkruar si huliganë radikalë pro-serbë.
Më vonë, autobusi me tifozët polakë u sulmua nga një grup tjetër pranë Rinasit, duke sjellë tensione të shumta dhe praninë e forcave të rendit.
Po ashtu, një episod i turpshëm është regjistruar dje në kryeqytet me tifozët polakë të ekipit Jagiellonia, të cilët përpara syve të qytetarëve kanë “pushtuar” një kioskë në Tiranë dhe kanë grabitur çfarë u ka dalë përpara.
Megjithatë, ajo që ka shkaktuar edhe më shumë zemërim është fakti se policia nuk ka marrë asnjë masë ndaj huliganëve polakë, të cilët përdhosën monumentet kombëtare, shfaqën flamuj ofendues, bënë thirrje raciste dhe dje grabitën kioskat në mes të qytetit. Në vend të kësaj, të vetmit që janë arrestuar janë disa tifozë shqiptarë, të cilët reaguan ndaj provokimeve dhe thirrjeve të rënda kundër shqiptarëve.
Ky standard i dyfishtë i trajtimit të ngjarjeve po shihet nga qytetarët si një padrejtësi e hapur, ku të huajt lejohen të shkelin ligjet dhe dinjitetin kombëtar, ndërsa shqiptarët ndëshkohen sapo reagojnë ndaj tyre.
Discussion about this post