Tifozi 100-vjeçar: Dhuroj pensionin vetëm që të fitojmë ndaj Milanit

Tifozi i apasionuar i Interit, Enrico Vanzini, shkoi në stadiumin “San Siro” për të parë ekipin e tij të zemrës duke luajtur për herë të parë në vitin 2022. Ai ishte 99 vjeç. “Pasioni im filloi kur isha 7 vjeç…. Nuk isha kurrë në gjendje të shkoja më parë në stadium, sepse nuk kisha para,” – tha Vanzini, tani 100 vjeç.

Një i mbijetuar i Holokaustit, Vanzini tani mezi pret përballjen gjysmëfinale të Ligës së Kampionëve, të mërkurën, kundër rivalëve të qytetit, kuqezinjve, dhe do ta ndjekë ndeshjen nga komoditeti i shtëpisë së të moshuarve në qytetin verior të Padovës.

“Iu luta Zotit që të më japë gëzimin e fitores së Interit dhe shpresoj se Ai do të pajtohet, – tha tifozi shekullor, duke veshur një bluzë të Interit me emrin e tij të shkruar në anën e pasme. – Unë do të bëja gjithçka për një fitore, duke përfshirë heqjen dorë nga pensioni im i vogël”.

Një ushtar në ushtrinë italiane gjatë Luftës së Dytë Botërore, Vanzini u kap nga gjermanët si rob lufte, pasi Italia iu dorëzua aleatëve më 1943 dhe u mbijetoi muajve të fundit të konfliktit në kampin nazist të përqendrimit “Dachau”.

Pasi u kthye në shtëpi, ai punoi si shofer autobusi dhe kamioni. Vanzini, i cili mori bluzën e personalizuar të Interit nga klubi për të festuar ditëlindjen e tij të 100-të, filloi të dëshmonte për përvojat e Holokaustit në fillim të viteve 2000.

Ai pret duke vështruar nga dritarja që postieri t’i dorëzojë “Gazzetta dello Sport” çdo ditë, gazetën më të njohur sportive në Itali. Gjithashtu ka një iPad dhe ka mësuar se si të shikojë sporte nga aplikacionet.

“Në të kaluarën, vizitoja miqtë që kishin televizor dhe nëse drejtoja autobusin, iu thosha njerëzve: Mos bërtisni, ju lutem, duhet të dëgjoj diçka”. Ishte komenti radiofonik i ndeshjeve të Interit.

Ai e admiron trajnerin e ekipit zikaltër, Simone Inzaghi, duke thënë se “ka bërë shumë pak gabime”.

Por ka një sugjerim për të ndihmuar ekipin e zemrës që ta mposhtë Milanin dhe të arrijë në finalen e parë të Champions League që nga viti 2010: “Në pjesën e parë nuk duhet të lodhemi shumë, të gjithë duhet të jenë në vendin e tyre”.