Perfeksionistët kanë standarde të larta, jo vetëm për veten e tyre, por edhe për fëmijët e tyre. Shpesh kjo është arsyeja që i çon ata drejt prindërimit helikopter, i cili është një lloj mbiprindërimi ku prindi i rri te koka fëmijës, pavarësisht moshës, dhe merr përsipër të kryejë detyra që fëmija është i aftë t’i bëjë vetë si për shembull: gatimin, pastrimin, pagimin e faturave etj.
Efektet negative të mbiprindërimit janë dokumentuar nga disa studime të cilat tregojnë se ai sjell ngarkesë psikologjike, narcisizëm, vështirësi përshtatjeje, përdorim të alkoolit dhe substancave narkotike, si dhe probleme të tjera të sjelljes që shfaqen tek të rinjtë e moshës 18-25 vjeç.
“Prindërit perfeksionistë jetojnë me arritjet e fëmijëve. Ata duan t’i shohin fëmijët të suksesshëm sepse kjo i bën ata të duken mirë” tha Sergin, profesor dhe dekan në Kolegjin e Shkencave Sociale dhe te Sjelljes në Arizona. “ Nuk them se nuk u bëhet vonë për fëmijët, por ata e matin vetëvlerësimin e tyre me suksesin e fëmijëve të tyre.”
Sergin dhe kolegët e tij kanë kryer dy studime ku kanë marrë pjesë 302 prindër, prej nga kanë nxjerrë rezultatin se perfeksionizmi është i lidhur me prindërimin helikopter. Sergin dyshon se nënat dhe baballarët që u lindën në vitet 70’ dhe 80’ janë më të prirur drejt perfeksionizmit që i bën ata rrjedhimisht të synojnë të ushtrojnë prindërimin helikopter. Fëmijët e këtyre viteve janë rritur me shumë përgëzime “je shumë i mirë, je i pari i klasës, je i veçantë, je shembullor” etj, por këto përgëzime ushqejnë perfeksionizmin tek fëmija, ndaj kur ata bëhen vetë prindër kërkojnë që fëmijët e tyre të jenë po aq të mirë, të veçntë dhe shembullorë”.
Studime të mëparshme të Sergin kanë treguar se përveç perfeksionistëve, edhe prindërit ankthiozë tentojnë të mbiprindërojnë. Prindërit ankthiozë janë të përqëndruar në shumicën e kohës se çfarë gjë e keqe do ndodhë ndaj ata prindërojnë duke pasur gjithmonë rrezikun në mend. Megjithatë jo gjithmonë prindërimi ankthioz shkon drejt prindërimit helikopter.
Tipari tjetër që zbuloi studimi i Sergin ishte fakti se nënat ishin ato që tentonin më shumë të ushtronin prindërimin helikopter. Sigurisht pati dhe një numër baballarësh, por numri i nënave helikopter ishte në mënyrë të dallueshme më i lartë; kjo edhe për faktin se në kulturën universale, përgjithësisht femrat janë ato që lidhen më shumë me përgjegjësitë e rritjes së fëmijës.
Këto studime ndihmojnë prindërit të kuptojnë se për të ndryshuar mënyrat e prindërimit, fillimisht duhet të njohin vlerat e vetvetes në mënyrë të pavarur nga ato të fëmijëve” tha Sergin.
