‘Klasikja’ e futbollit shqiptar ka startuar ditën e sotme në stadiumin ‘Loro Boriçi’ ku Tirana udhëtoi në transfertë për tu përballur me Vllazninë.
Sfida ishte e luftuar që në minutat e para, ku këtë fakt e tregoi edhe ndëshkimi me karton të verdhë i Ngo për tu ndjekur më pas edhe nga ndëshkimi i Heric po me karton të verdhë nga kampi kundërshtar.
Minuta e 25’ do të sillte ndryshimin e shifrave të takimit, me Xhixhan që gjen golin e avantazhit për Tiranën, një gol fillimisht i diskutueshëm, por duhej të pritej ndërhyrja e sistemit VAR dhe pas konsultimit me kryesorin e ndeshjes, ai do të cilësohej i vlefshëm me shifrat e pjesës së parë që tani shkojnë në 1-0.
Pjesa e dytë nisi vrullshëm nga vendasit, ku shkodranët kërkuan çdo mundësi për të gjetur hapësira në mbrojtjen e Tiranës së Orges Shehit por pa sukses.
Situata do të vështirësohej për miqtë, ku Ardit Toli do të bënte një ndërhyrje të rrezikshme ndaj Da Silvës, dhe sërisht gjyqtari kërkon ndihmën e sistemit VAR për të qartësuar situatën.
Pas konsultimit, kryesori i takimit akordon kartonin e kuq për Tolin, duke e lënë Tiranën me 10të lojtarë, por kjo nuk e ka penguar aspak Taulant Seferin që të tundë sërisht rrjetën shkodrane.
Minutën e 81’ sulmuesi merr një top nga mesfusha dhe finalizon duke i dërguar shifrat në 2-0, duke ngritur në peshë gjithë tifozerinë bardheblu të pranishme në ‘Loro Boriçi’.
Gjatë festimit Seferi heq fanellën, dhe kjo nuk mund të kalohej pa u ndëshkuar, ku u akordua edhe një karton i verdhë për golashënuesin.
Pas përfundimit të këtij takimi, Tirana ruajn pozitat në kreun e tabelës së Superligës Shqiptare, me 17 pikë, ndërsa vllaznia mbetet në pozitën e katërt me 9 pikë.
