Tirana Bank ka vendosur në fund të muajit maj të zvogëlojë kapitalin e regjistruar dhe të paguar aksioner, duke zbritur humbjet e mbartura në vite.
Nga kapitali aksioner total me vlerë rreth 79.9 milionë eurosh, Tirana Bank ka ulur 38.1 milionë euro humbje të akumuluara nga periudha kur banka kontrollohej prej Grupit Bankar të Pireut. Pas zvogëlimit, vlera e kapitalit aksioner të Tirana Bank do të jetë rreth 41.8 milionë euro.
Sipas Tirana Bank, një vendim i tillë është marrë për të pasqyruar më mirë pozicionin financiar të bankës, duke përthithur humbjet e mbartura në vite. Vendimi për zvogëlimin e kapitalit të regjistruar nuk cenon parametrat e mjaftueshmërisë së kapitalit të bankës, që janë sipër niveleve të kërkuara nga Banka e Shqipërisë. Nga 15% që është raporti i mjaftueshmërisë së kapitalit i kërkuar për të nga Banka e Shqipërisë, Tirana Bank e raporton këtë tregues në nivelin 17.3%, duke përfshirë këtu edhe fitimin e kapitalizuar të vitit 2020.
Një vendim të ngjashëm me Tirana Bank pati marrë edhe Banka Amerikane e Investimeve, që në vitin 2018 vendosi të zbresë nga kapitali i regjistruar aksioner humbjet prej rreth 5.2 miliardë lekësh të mbartura nga periudha kur banka ishte nën zotërimin e grupit francez Credit Agricole.
Grupi Bankar i Pireut shpalli marrëveshjen për shitjen e Tirana Bank te konsorciumi i përbërë nga grupi Balfin dhe Komercijalna Banka në gusht 2018 për vlerë vlerë prej 57.3 milionë eurosh, ndërsa procesi i shitjes u mbyll në fillim të vitit 2019. Në dhjetor të vitit 2020, grupi Balfin bleu edhe aksionet e bankës maqedonase Komercijalna Banka, duke u bërë pronar i vetëm i Tirana Bank.
Pas ndryshimit të pronësisë, performanca financiare e Tirana Bank është përmirësuar ndjeshëm. Për vitin 2019, banka raportoi një fitim neto në vlerën e 400 milionë lekëve, ndërsa për vitin 2020 fitimi u rrit më tej në 670 milionë lekë. Raportimet paraprake tregojnë një performancë pozitive edhe në tremujorin I 2021, me një fitim neto në vlerën e 207 milionë lekëve.
Paralelisht, Tirana Bank është shfaqur si një nga bankat më aktive në zgjerimin e biznesit. Në dy vitet e fundit, totali i aktiveve të bankës është rritur me 15%, ndërsa portofoli neto i kredisë është zgjeruar me 81%. Sipas të dhënave të tremujorit të parë të vitit 2021, Tirana Bank është banka e shtatë më e madhe në vend, me rreth 5.3% të aseteve të tregut bankar.
