Emisioni “Fol” u ndal sot në Shkozë, ku edhe në vitin 2024 ka rrugë që për qerre.
Bëhet fjalë për segment afro 700 metra, që është lënë totalisht në harresë nga bashkia, dhe ku është e pamundur të kalojë ambulanca apo zjarrfikësja.
Në total janë rreth 70 familje që preken dhe që kërkojnë trajtim të barabartë me banorët e tjerë të kryeqytetit, pasi i paguajnë po njësoj taksat.
Një banor thotë për MCN TV se:
“Kjo është rruga e vdekjes. Një zotëri është batuar këtu. Unë kam paguar si të isha në sheshin ‘Skënderbej’.
Një tjetër banor shprehet:
“Në krahë i mbajmë fëmijët se nuk ngjitet makinë. Kemi shkuar në bashki, nuk mbaj mend kryetar të vijë këtu. Deputeti ka ardhur deri te asfalti. Nuk të lënë të hysh te bashkia, vetëm informacion letër. Batakçijntë e sollën materialin dhe e morën prapë. Nuk hyn as ambulanca, as zjarrfikësja, as taksia. Policia vjen. Nuk të lënë ta rregullosh vet rrugën, e quajnë ndërtim pa leje, të vë gjobë policia”.
Një tjetër banore e zonës thotë:
“Ne kërkojmë një të drejtë. Pse e lë deri këtu rrugën?! Ne jemi banorët më të hershëm. Unë jam e 90-ës këtu. Duhet t’i vërë gishtin kokës bashkia, se njerëzit janë të gjithë njësoj. Këto banorë pse anashkalohen?! Pse nuk respektohen?!”
Discussion about this post