Kjo e dielë ka qenë e mbushur me trofe për klubin e sporteve të Tiranës. Bardheblutë kanë triumfuar në basketboll për meshkuj dhe volejboll për femra dhe meshkuj.
Në basketboll Tirana triumfoi ndaj rivalëve historikë të Partizanit, të cilët i mundën me rezultatin 88-64. Kjo ndeshje u dominua totalisht nga skuadra e Tiranës, gjë që e tregoi edhe diferenca prej 24 pikësh në rezultatin përfundimtar.
Tirana fitoi Kupën e Federatës në volejbollin e meshkujve, teksa mposhti në finale Vllazninë me rezultatin e pastër 3-0.
Ndërsa në finalen e Kupës së Federatës në volejboll për femra, Tirana e pati shumë më të vështirë të fitonte ndaj Partizanit, teksa iu deshën 5 sete për të arritur këtë sukses. Bardheblutë e nisën mjaft mirë sfidën, kur fitoi dy setet e parë të ndeshjes me rezultatin 25-21 dhe 25-14.
‘Të kuqtë’ reaguan dhe arritën të fitojnë setin e tretë 25-20 dhe më pas edhe të katërtin 25-17, për ta çuar këtë përballje në set final.
Ishte ky fraksion momenti kur Tirana u shfaq në nivelet e seteve të pare, duke e fituar atë 15-8 dhe krejt ndeshjen 3-2, për të ngritur edhe trofeun e Kupës së Federatës./Gijotina.com
