Pas triumfit në finalen e Kupës së Shqipërisë dy javë më parë, Tirana përsërit të njëjtën rezultat në Korçë, duke mundur 3-2 Skënderbeun. Takimi ishte i vlefshëm për javën e 14-të dhe të fundit të sezonit të rregullt të Superligës në volejboll për femra.
Një ndeshje me emocione dhe rivalitet, ku volejbollistet vendase kaluan dy herë në epërsi, por gjithnjë u arritën nga bardheblutë (28-30, 25-15, 20-25, 25-17, 15-13). Një fitore për statistikë, pasi korcaret e kanë siguruar vendin e parë e Tirana të dytin, duke avancuar në gjysmëfinale.
Në vendin e tretë qëndron Partizani edhe pse u mund sot pasdite 3-0 nga Pogradeci (25-19, 25-20, 25-17). Një ndeshje e komanduar nga liqenoret në të trija setet, ndërsa kryeqytetaset duket se mendonin më shumë për fazën play off, ku janë kualifikuar të dyja skuadrat.
Në kryeqytet, fitore surprizë arriti Barleti Volley, që mundi 3-2 Teutën (21-25, 25-19, 21-25, 25-18, 15-9). Një fitore që nuk ndryshon fatin e skuadrës barletase, që zbret në Kategorinë e Parë sezonin tjetër. Ndërsa për Teutën, kjo pikë e fituar e mban në zonën para-play off.
Fitore për statistikë korri Vllaznia, që mundi 3-1 Dinamon në Shkodër, duke mos vijuar dot më tej garën për titull (20-25, 25-23, 25-21, 25-20). Shkodranet janë në vendin e parafundit dhe do të luajnë në play out me skuadrën e renditur e dyta në Kategorinë e Parë.
Superliga-Femra, java e 14-të
Vllaznia – Dinamo, 3-1
Skënderbeu – Tirana, 2-3
Barleti Volley – Teuta, 3-2
Pogradeci – Partizani, 3-0
Renditja: Skënderbeu 38 pikë, Tirana 35 pikë, Partizani 28 pikë, Pogradeci 15 pikë, Dinamo 15 pikë, Teuta 15 pikë, Vllaznia 14 pikë, Barleti Volley 5 pikë.
Para-Play off
Partizani – Teuta
Pogradeci – Dinamo
Discussion about this post