Protestat kundër qeverisë pritet të vijojnë edhe gjatë ditës së sotme në Tiranë, pas përshkallëzimit të tensioneve mbrëmjen e djeshme përpara Kryeministrisë dhe në disa zona të kryeqytetit.
Ajo që nisi si një protestë paqësore e studentëve është shoqëruar me përplasje të forta me forcat e rendit. Sipas raportimeve të dhëna, policia ndërhyri disa herë për shpërndarjen e demonstruesve, duke përdorur gaz lotsjellës dhe automjete ujëhedhëse. Protestuesit u rikthyen vazhdimisht në bulevardin “Dëshmorët e Kombit”, ndërsa tensione u regjistruan edhe në Sheshin Skënderbej, Rrugën e Durrësit dhe pranë Ministrisë së Arsimit.
Ndërkohë, protesta ka marrë përmasa më të gjera me bashkimin e pedagogëve, të cilët kanë paralajmëruar se do të dalin çdo ditë në orën 10:00, deri në dorëheqjen e kryeministrit Edi Rama.
Kreu i Sindikatës së Pedagogëve, Sandër Kovaçi i kërkoi kryeministrit Rama që të japë dorëheqjen dhe t’i japë zgjidhje politike situatës së krijuar. Sipas tij, kjo qeveri nuk i dëgjon studentët dhe kur nuk dëgjon protestat paqësore do përballesh me të rinj të revoltuar. Ai kërkoi gjithashtu reagimin e përfaqësive ndërkombëtare lidhur me dhunën e pretenduar ndaj protestuesve.
“Kjo është një qeveri që nuk dëgjon. Meqë nuk dëgjoi studentët, është logjike që do eskalonte kjo lëvizje. Kur nuk u përgjigjesh protestave paqësore, do presësh protestues të revoltuar. Fatkeqësisht qeveria dhe kryeministri në vend që t’u përgjigjej protestuesve paqësorë, sot ajo iu përgjigj me dhunë. Ajo që është më e keqja është se në kemi parë edhe persona civilë që rrezikojnë jetën e qytetarëve, ne si profesorat jemi të shqetësuar. Brutaliteti ndaj rinisë shqiptare është i papranueshëm. U bëjmë thirrje përfaqësive ndërkombëtare, ambasadave që të hedhin sytë nga Shqipëria dhe nga ky brutalitet”, tha Kovaçi.
Nga ana tjetër, oferta e kryeministrit Rama për dialog është refuzuar nga studentët, ndërsa vijimi i protestave sinjalizon se përplasja mes demonstruesve dhe qeverisë mbetet e pazgjidhur.
Sindikata e Punonjësve të Universiteteve të Shqipërisë (SPUSH) ka shpallur bojkotin e mësimdhënies në të gjitha universitetet publike të vendit, në solidaritet me studentët dhe nxënësit që protestojnë në Tiranë. Sipas njoftimit të sindikatës, bojkoti do të nisë më 21 tetor dhe do të vijojë deri në një njoftim të dytë.
Vendimi është marrë njëzëri nga kryesia e sindikatës, gjatë mbledhjes së zhvilluar më 20 tetor në sheshin e protestës së studentëve dhe nxënësve. Sindikata shprehet se kjo nismë vjen në mbështetje të kërkesave të të rinjve dhe në mbrojtje të së drejtës së tyre për të protestuar paqësisht.
Protesta e paralajmëruar për sot pritet të jetë një tjetër moment i rëndësishëm i mobilizimit studentor dhe të pedagogëve, pas tetë ditësh tubimesh dhe tensionesh në kryeqytet.
Discussion about this post