Kryebashkiaku i Tiranës, Erion Veliaj ka bërë me dije se në Tiranë janë mbjellë 500 mijë pemë.
Ai ishte në një lidhje të drejtpërdrejtë së bashku me përfaqësues të disa vendeve, ku dhe bëri deklaratën. Në fakt, ndryshe nga sa Veliaj bëri me dije, Tirana njihet si qyteti me betonizimin më të lartë. Po shkatërrohen hapësirat e gjelbra dhe po ndërtohen godina shumëkatëshe, ku nuk kanë munguar as denoncimet e qytetarëve.
Por, në media kryetari i Bashkisë Tiranë mburret me punën e bërë, madje bën me dije se deri në vitin 2030 objektiv është mbledhja e 2 milionë pemëve.
“Tirana është një qytet që ka 50% të GDP-së, por gjithashtu edhe 50% të ndotjes dhe 50% të gazrave serë. Ne nisëm 5 vjet më parë me Pyllin Orbital, pastaj thamë po sikur çdo fëmijë në Tiranë të mbjellë nga një pemë për ditëlindje dhe kështu kemi arritur të mbjellim deri tani 500 mijë pemë për një qytet me 1 milion banorë dhe deri në vitin 2030 objektiv është të mbjellim 2 milionë,” u shpreh Veliaj.
Kryetari i Bashkisë së Tiranës, Erion Veliaj, është bërë pjesë e Konferencës së Kombeve të Bashkuara për ndryshimet klimatike të vitit 2021 që po zhvillohet në Glasgow. Ky është Samiti i 26-të vjetor i COP, siç quhet ndryshe “Konferenca e Palëve”. Vendeve të ndryshme u është kërkuar të paraqesin objektiva ambicioze për reduktimin e emetimeve të gazrave deri në vitin 2030 dhe zerimin e tyre deri në mesin e këtij shekulli.
Një prej faktorëve negativ është dhe shpyllëzimi, ku në vendin tonë është një fenomen tejet i përhapur. Madje në krye qëndron Tirana, me dhunën që po pëson dita ditës.
Discussion about this post