Ditën e sotme u mbyll edhe java e 13-të e Kategorisë Superiore me Tiranën që bëri një hap fals përballë Laçit. Trajneri i bardhebluve, Orges Shehi ka folur pas humbjes 1-0 dhe ka thënë se kjo ishte ndeshja më e dobët e Tiranës. Shehi shtoi se ekipi është me meritë në vendin e parë, por nuk ishte dita e tyre dhe nuk bënë atë që duhej për të qarkulluar topin.
“Kjo ndeshje mund të jetë më e dobëta e jona, nuk ishim ata që duhet të ishim. Ndeshja po shkonte drejt barazimit, por një episod vendosi që të linim pikët. Nuk është se do të ndryshoja diçka, duhet të ishim më të qartë. Ishim konfuz dhe e tepruam me mbajtjen e topit. Mendoj se skuadra e Laçit luajti mirë dhe fitoi me topat e dytë. Por disa episode i nxorën fitues.
Kampionati është ne një fazë që ndeshjet janë shumë të rëndësishme dhe javë për javë përballesh me kundërshtarë direkt. Është shumë e rëndësishme mos të humbasësh.
Nuk mendoj që Laçi të jetë skuadër më e fortë se ne, diferencat janë shumë të vogla. Jemi me meritë në vendin e parë. Ishte një ditë jo për ne, nuk ishim të qartë, nuk bëmë atë që duhej të bënim për të qarkulluar topin”, tha Shehi.
I pyetur nëse duhet të afrohet ndonjë lojtar gjatë merkatos, Shehi u përgjigj:
“Organika jonë ka lojtar me tipare shumë ofensive. Kemi Tolin dhe Kukën me tipare defensive. Mendoj që duhet ti alternojmë pak. Ne do ndryshojmë për mbajtjet e tepruara të topit. Duhet të fokusohemi dhe pas shumë pak ditësh luajmë kundër Teutës. Lojtarët duhet ta ngulisin në kokë që po nuk ndryshuan krahun e lojës, po nuk luajtën shpejt atëherë nuk kemi gjë në vijë.”
Discussion about this post