Një i ri është shoqëruar pasditen e sotme nga policia e Tiranës për verifikim pasi dyshohet se është shpërndarës droge.
Identiteti i të shoqëruarit nuk jepet nga policia, por sipas burimeve mësohet se është rreth 30-vjeç.
Mësohet se shënjestra që ishte duke lëvizur me një makinë tip “Fiat” u bllokua pranë ish-Parkut të Autobusëve, teksa po tentonte që të dilte te Rruga e Kavajës.
Tre makina policie e rrethuan menjëherë “Fiat”-in, por shënjestra doli me shpejtësi nga makina duke u larguar me vrap mes pallateve të zonës.
Forcat “Shqiponja” rrethuan zonën, por pas disa minutash, 30-vjeçari u kthye në vendin e ngjarjes ku braktisi makinën duke u dorëzuar.
Nga kontrolli në makinë dhe në trup efektivët nuk i gjet asgjë e jashtëligjshme të riut, por dyshojnë se mund të ketë hedhur lëndën narkotike në momentin që iku me vrap.
