Shumë qytetarë zgjedhin për të lëvizur me biçikletë si një mënyrë alternative ndaj përdorimit të makinës, duke shmangur kështu edhe trafikun e madh në Tiranë. Por vitet e fundit numërohen shumë aksidente ku mjetet godasin çiklistët, me pasoja shumë të rënda, deri edhe në vdekje.
Mos respektimi i sinjalistikës nga ana e drejtuesve të automjeteve, duke i bllokuar korsitë e biçikletave, detyron çiklistët të futen vazhdimisht në korsitë e automjeteve në lëvizje, duke rrezikuar aksidente fatale. Korsitë e dedikuara për biçikletat, bllokohen në shumë rrugë të Tiranës dhe çiklistët detyrohen të ndajnë rrugën me makinat.
Problem tjetër është edhe stacionet e urbanëve si dhe mungesa e parkingjeve të dedikuara. Ndaj vendparkimi kryesor për biçikletat mbeten pemët ose shtyllat e ndriçimit. Jo të gjitha korsitë i plotësojnë kriteret e duhura të sigurisë rrugore, pasi disa prej tyre janë më të ngushta se standardi i kërkuar prej dy metrash, si dhe mungojnë semaforët e dedikuar në kryqëzime.
