Duke filluar nga data 1 shtator, konsumatori shqiptar do të jetë i detyruar të paguajë më shumë për bukën. Në kryeqytet çdo bukë do të kushtojë 10 lekë më shumë se çmimi aktual. Kjo rritje shkon paralel me çmimin e miellit e cila pësoi një lëvizje drastike pak ditë më parë. Ky ndryshim është reflektuar nga zhvillimet në tregun ndërkombëtar. Çdokush mund të mendoje se rritja e çmimit do të shoqërohet edhe me rritjen e cilësisë por nga të dhënat e deritanishme ky konkluzion logjik bie poshtë. Në furrat e Tiranës prej disa ditësh është paralajmëruar ngritja e çmimit të bukës. Vetëm disa javë më parë, i njëjti shqetësim u ngrit dhe nga qytetarët e Fierit, ku në disa furra çmimi i bukës u rrit me 20 lekë.
