Një aksident tragjik ka ndodhur sot në një kantier ndërtimi në Tiranë, ku një 66-vjeçar ka humbur jetën. Ngjarja ndodhi rreth orës 09:30 në zonën e Kinostudios. Viktima, i identifikuar si Rrahman Mija, dyshohet se ka rënë nga lartësia gjatë punës, duke gjetur vdekjen e menjëhershme.
Policia njoftoi se një grup hetimor po punon për të zbardhur rrethanat e plota të kësaj tragjedie dhe për të dokumentuar rastin.
Kjo ngjarje e rëndon edhe më tej bilancin e aksidenteve në punë në Shqipëri, i cili mbetet problematik. Sipas të dhënave të fundit nga Inspektoriati i Punës, gjatë gjashtëmujorit të parë të këtij viti, 99 punonjës janë aksidentuar, ndërsa 20 prej tyre kanë humbur jetën. Ky numër përfaqëson një shifër alarmante: një në pesë punonjës të aksidentuar ka ndërruar jetë, një situatë më e rëndë se vitet e kaluara.
Sektori i ndërtimit mbetet më problematik, me 6 viktima në 19 aksidente. Kjo do të thotë se një në tre punonjës të aksidentuar në këtë sektor ka humbur jetën. Aksidente me pasoja fatale janë regjistruar edhe në sektorin e energjisë elektrike, miniera, tregti dhe industri prodhuese.
Inspektoriati i Punës ka vendosur masa administrative në 100% të subjekteve ku kanë ndodhur aksidente, duke përfshirë gjoba, paralajmërime dhe pezullime të punës. Vlera totale e gjobave të vendosura arrin në 14,270,000 lekë. Megjithatë, këto shifra tregojnë se sfidat me sigurinë në vendin e punës mbeten serioze. Gjatë vitit të kaluar u regjistruan 177 aksidente me 33 viktima, ndërsa numrat e këtij viti duket se po e ndjekin këtë trend të rëndë.
Discussion about this post