Tiranës i është rikthyer Panairi i Librit, pas një viti mungesë për shkak të pandemisë Covid-19. Edicioni i 24-t i kësaj ngjarjeje do të hapet ditën e sotme (e mërkurë) dhe do të zgjasë deri më 21 nëntor.
Botues, shkrimtarë, përkthyes dhe të adhurues të librit do të bëhen bashkë në Pallatin e Kongreseve. Këtë vit ky panair, përveç titujve të rinj për lexuesit, do të sjellë takime me autorë e përkthyes, tryeza diskutimi, workshope, seminare e të tjera. Por janë më pak botues, sesa në edicionet para pandemisë, përderisa do të mbahet edhe nën masat anti-COVID.
“Sa më të shkurtra të jenë qëndrimet, aq më mirë është për të gjithë. Orari do jetë nga ora 09:00 deri në orën 20:00. Do të ketë një orë pushimi, nga ora 14:00-15:00, për t’u ajrosur dhe janë të ndaluara vizitat kolektive. Ka shumë të ftuar, por unë do të përmend njërin prej tyre, që është Nicola La Goia, shkrimtar dhe president i sallonit të Librit në Torino”, citohet të ketë thënë Petrit Ymeri, kryetar i Shoqatës së Botuesve të Shqipërisë, e cila me mbështetjen e Bashkisë së Tiranës dhe të Qendrës Kombëtare të Librit e Leximit e organizojnë Panairin.
Vitin e kaluar Panairi i Librit i Tiranës erdhi me formatin online kurse sivjet nën masat anti-covid.
Discussion about this post