Juventusi ka shpëtuar nga një turpërim në shtëpi, teksa ka ruajtur pathyeshmërinë në Serinë A në këtë edicion falë një goli në minutën e 92-të. Por gjithsesi, skuadra e Tiago Motës vazhdon të jetë e abonuar me barazimet dhe sot ndaj Bolonjës, regjistroi të 9-in e këtij edicioni, të tretin radhazi në kampionat.
Përballë ish-skuadrës së trajnerit të juventinëve, gjithçka nisi keq për bardhezinjtë, që shpëtoi fillimisht nga shtylla, e më pas u ndëshkua nga goli i Ndoj.
Vetë Tiago Motën nuk e mbanin nervat gjatë gjithë ndeshjes dhe ai u ndëshkua me karton të kuq në startin e pjesës së dytë, teksa më pas pa nga tribuna se si ekipi i tij pësoi edhe golin e dytë nga Pobega.
Nga tribunat nisën kontestimet e tifozëve dhe kjo solli një reagim nga bardhezinjtë, të cilët shkurtuan diferencën me Kopmainers.
Me aktivizimin e emrave si Jilldiz, Turam, Savona e Mbangula, bardhezinjtë shtynë përpara dhe në shtesë gjetën barazimin e Mbangula.
Një barazim që shmang humbjen. por që sheh edhe më shumë kreun e renditjes t’i largohet, duke vënë në rrezik edhe pjesëmarrjen në Champions në situatën aktuale.
Discussion about this post