Një tjetër aksion arrestimesh të nivelit të lartë raportohet se po zhvillohet nga ana e SPAK. Burime bëjnë me dije se janë lëshuar urdhër-arreste për personazhe të tjerë, të cilët rezultojnë të implikuar në dosjen e korrupsionit të AKSHI-t me tendera sekretë dhe të hapur, ndëra thuhet se disa biznesmenë të implikuar në dosje janë arratisur dje dhe sot drejt Dubait.
Sipas burimeve, SPAK ka kërkuar në GJKKO masë sigurie për Sekretarin e Përgjithshëm të Kryeministrisë, Engjëll Agaçin, lakuar dhe i akuzuar për implikim në afera korruptive, pastrim parash, lidhje me krimin dhe ndikim në drejtësi.
Krahas Agaçit, SPAK mësohet se ka kërkuar arrestimin e biznesmenit Gerond Meçe, i cili është edhe viktimë si i marrë peng, edhe i implikuar në dosjen e korrupsionit të AKSHI-t. Emri i Meçes është i lidhur me rreth 50 milionë euro para publike të përvetësuara me tendera kryesisht sekretë dhe kontrata fiktive për shërbime në letër, përmes kompanisë Artificial Intelligence Business Solutions.
Gerond Meçe, i cili fshihej pas mamasë së tij, Shegush Meçe, dyshohet se është prestamnome i Armand Frangut, i njohur si baxhanaku i kryeministrit Rama. Sipas burimeve, ka kërkesë nga SPAK-u në GJKKO për arrestimin edhe të Armand Frangut si pjesë e një skeme korrupsioni me tenderat e AKSHI-t, me kosto dhjetëra milionë euro. Sipas burimeve, një pjesa më e madhe nga shuma 50 milionë euro të përfituar nga Meçe kanë përfunduar në xhepat e Frangut.
Besohet se urdhër-arrest ka edhe për Endri Meksin, i cili rezulton i përfshirë në dy dosje të fundit të SPAK; Në dosjen e AKSHI-t dhe në dosjen për zv/kryeministren Belinda Ballukun. Meksi ka përfituar 33 milionë euro tendera dyshuar si korruptivë nga ARRSH, ndërsa ka qenë për disa vite protagonist i një skeme korrupsioni me tenderat e AKSHI-t deri kur e nxorën jashtë loje dhe nisi të sulmonte AKSHI-n me mediat e kontrolluara prej tij.
Endri Meksi rezulton pjesë e dosjes 16 mijë faqe të SPAK-ut për zv/kryeministren Belinda Balluku, e cila i referohet Meksit me epitetin ‘palla’. Meksi, sipas përgjimeve në dosje, ka përdorur median e tij si instrument presioni dhe shantazhi për të përlarë para publike, përmes tenderave me natyrë korruptive. /Prapaskena
Discussion about this post