Mendim Muçiqi, toger i Forcës së Sigurisë së Kosovës, ka diplomuar në Akademinë Mbretërore Ushtarake të Sandhurst në Britaninë e Madhe.
Ambasada e Britanisë së madhe në Kosovë ka njoftuar se Muçiqi ka përfunduar me sukses programin 1-vjeçar të udhëheqjes së oficerëve të rinj.
Me këtë rast, në ceremoninë e diplomimit ishte prezent edhe Mbreti Charles III.
“Urime togerit Mendim Muçiqi nga Forca e Sigurisë së Kosovës, i cili ka diplomuar me sukses në Akademinë Mbretërore Ushtarake Sandhurst pas përfundimit të programit njëvjeçar të udhëheqjes së oficerëve të rinj – një përvojë intensive sa kërkuese fizikisht aq edhe sfiduese akademike”, shkruan Ambasada e Britanisë së Madhe në Kosovë.
“Ne ishim të nderuar të shihnim togerin Muçiqi të gradohej para mbretit Charles III në Paradën e 200-të të Sovranit, së bashku me Gjeneral Brigade Jeton Dreshaj, Komandant i Komandës së Trajnimit dhe Doktrinës”.
Ambasada britanike rikujton se do të vazhdojë të mbështesë FSK-në dhe edukimin e oficerëve të rinj të saj.
“Si aleat të Kosovës, ne do të vazhdojmë të mbështesim Forcat e Armatosura të saj dhe të ndihmojmë në edukimin e oficerëve dhe nënoficerëve të rinj në institucionet tona ushtarake më prestigjioze”, deklaron Ambasada britanike.
Ky mision diplomatik rikujton se deri më tani, Mbretëria e Bashkuar ka trajnuar më shumë se 25 pjesëtarë të Forcës së Sigurisë së Kosovës në Sandhurst.
“Dhe angazhimi ynë për të edukuar një gjeneratë të re të FSK-së është i palëkundur”./REL/
https://www.facebook.com/UKinKosovo/posts/560475876192047
Discussion about this post