Tonin Marinaj, kryetari i Bashkisë Malësia e Madhe është kujtuar tani që fillon viti i ri shkollor të rikonstruktojë një shkollë. Gjithë muajt e verës, Marinaj merrej me afera të tjera në bashkëpunim me biznesmenët që përfitonin këto kontrata në tenderë në kundërshtim me ligjin.
Tenderi i radhës ka si objekt “Rikonstruksion i shkollës “Muhamet Hasmuja”, Ktosh. Godina e shkollës 9-vjeçare në fshatin Ktosh që shtrihet në njësinë administrative Gruemirë, ka rreth 20 vite që nuk ka patur asnjë investim për rikonstruktimin e saj. Pavarësisht se në vitin 2017 u denoncua në media gjendja e saj e amortizuar, që ishte kthyer në një rrezik për nxënësit.
Denoncimi në vitin 2017
Siç duket, Marinaj nuk ka hallin e shkollës, por si të çojë fondin tek kompania e paracaktuar të fitojë tenderin. Ky tender ka marrë “Red Flag” nga Open Data Albania, çka do të thotë se kemi të bëjmë me abuzim dhe vënie në rrezik të fondit. Marinaj ka shpallur garën për këtë tender me datë 3 gusht 2023 dhe 15 ditë më vonë ka mbyllur afatet për dorëzimin e dokumenteve nga operatorët e interesuar.
Sakaq, në dokumente tregohet se vetëm dy kërkesa janë dorëzuar për këtë projekt, një nga bashkimi i operatorëve “Miculi” shpk & “Everest” shpk dhe oferta tjetër nga Eduart Çela pf. Si për çudi ky i fundit nuk paraqiti një ofertë ekonomike. Në këtë rast Marinaj duhej që të bënte rishpalljen e tenderit, sepse kishte konkurrencë.
Por, pa garë fare, bashkia ia ka kaluar paratë kompanive “Miculi” shpk & “Everest” shpk, të njohur për korrupsion dhe mashtrime në fushën e tenderëve.
Mashtruesit që fitojnë tenderë
Kompania ‘Everest’ është pjesë e klientelës së kryebashkiakëve Rakip Suli dhe Erion Veliaj. Publikimi i listës së pagave ka nxjerrë në pah edhe mos pagimin e taksave dhe sigurimeve të punonjësve. ‘Everest’ sh.p.k, ka administrator dhe bashkëpronar Sokol Çupin dhe bashkëpronari tjetër kryesor është Ilir Çupi.
Ndërsa një përqindje e vogël e aksioneve zotërohet nga Hyqmet Valteri, Esat Valteri, Albert Valteri dhe Kujtim Valteri.
Në listëpagesat e publikuara tregohej se inxhinierët, topografët dhe arkitektët në kompaninë e tyre paguheshin me 30 deri 40 mijë lekë në muaj, 4-5 herë më pak se sa paga reale e tregut. Jo vetëm kaq, por në kompaninë ‘Everest’ figuronin punëtorë edhe me 21 mijë lekë në muaj ose 210 mijë lekë të vjetra, madje kishte punëtorë krahu që paguhen me 10 mijë lekë.
Edhe në deklarimet që bënin për shpenzimet për secilin zë duket që ajo për pagesën e punonjësve ishte shumë e ulët edhe pse pjesën më të madhe të stafit kompania e kishte inxhinierë dhe arkitektë.
Burimi: OpenProcurement
Duket se kompania operon me dy palë bordero, duke paguar punëtorët nën dorë, për të shmangur taksat. Kjo ndodhte kur Tatimet dhe organet e tjetra ligjzbatuese lejonin një mashtrim të tillë me pagat, kur bizneseve të vogla iu bëhet presion për taksat. Për këtë vepër penale, APP duhej ta kishte përjashtuar kompaninë nga pjesëmarrja në tenderët publikë.
Lexo edhe: “Leku letër” në Malësinë e Madhe, jepen pa garë 650 mln lekë për riparimin e një rruge 6 km
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post