Ish-kryeparlamentarja, Jozefina Topalli, ka theksuar sonte se ajo mbështet hapur Berishën dhe e cilëson “Foltoren” e tij , si një ndër më të rëndësishmet e 20 viteve të fundit. Ajo tha gjatë një interviste televizive se, kjo nismë i ka bërë nder jo vetëm PD-së, por gjithë skenës politike në Shqipëri.
“Po ndodh një lëvizje që ka zgjuar bazën e Partisë Demokratike, ka ndërgjegjësuar nevojën e një reformimi të PD. Mund të konsiderohet si një ndër lëvizjet më të rëndësishme të 20 viteve të fundit. Nisur nga fakti që PD po ecte në një biznar pothuajse të vdekur, kjo shihet si një shpresë për një rindërtim të së djathtës, e shpresë për të ardhmen. I bën nder edhe gjithë skenës politike shqiptare”, tha ajo.
Topalli tha ndër të tjera se “ Foltorja” mund të quhet parlament i popullit për shkak se u krijua në një moment delikat për PD-në. Sipas saj, për gjendjen e rëndë në të cilën ndodhet sot Partia Demokratike, janë fajtorë të gjithë ata që kanë heshtur gjatë gjithë këtyre viteve. “Kryetari i saj humb për herë të pestë dhe sikur s’ka ndodhur asgjë vazhdon të shtrëngojë karrigen për të cilën qëndron për të mbajtur peng të djathtën. Në këtë aspekt, është e vonuar, por lëvizje e domosdoshme. Foltorja në njëfarë mënyrë është parlamenti i popullit”, u shpreh ajo.
Topalli ka qenë gjithmonë në mbështetje të Berishës dhe gjithmonë ka shfaqur hapur kritikat e saj për Bashën, madje shpesh herë e akuzon atë se bashkëpunon kundër PD me Ramën.
