Një alarm për bombë ka vënë në lëvizje strukturat e sigurisë në qendrën tregtare “Toptani” në Tiranë, duke shkaktuar evakuimin e menjëhershëm të qytetarëve dhe stafit nga ambientet e brendshme.
Sipas informacioneve paraprake, sinjalizimi është marrë nga autoritetet dhe, në zbatim të protokolleve të sigurisë, është urdhëruar boshatisja e objektit për të shmangur çdo rrezik potencial për jetën e njerëzve. Në vendngjarje kanë mbërritur forcat e Policia e Shtetit, të cilat kanë rrethuar perimetrin dhe kanë vendosur masa të shtuara sigurie.
Deri më tani nuk ka raportime për të lënduar, ndërsa qytetarët janë mbajtur në distancë sigurie. Zona përreth është monitoruar nga patrullat e policisë dhe lëvizja është kufizuar përkohësisht.
Autoritetet u bëjnë thirrje qytetarëve të shmangin zonën dhe të ndjekin udhëzimet e policisë deri në një njoftim të dytë.
Pas verifikimit, policia deklaroi se rreth orës 20:10, shtetasi A. D, ka njoftuar sallën operative të DVP Tiranë se në email e tij ka ardhur një mesazh se në qendrën tregtare ku ai punon si shef security është vendosur një sasi lëndë plasëse, e cila do shpërthejë në orën 20:30.
Menjeherë në vendngjarje kanë shkuar shërbimet e Policisë, Forcat Xheniere dhe shërbimet e Antiterritorit, të cilët kanë kontrolluar qendrën dhe nuk kanë konstatuar asgjë të paligjshme.
Grupi hetimor po punon për identifikimin e shtetasit që ka dërguar emailin dhe për sqarimin e rrethanave të rastit.
Discussion about this post