Katër persona u vranë nga një tornado që goditi shtetin amerikan të Misurit sot. Autoritetet kanë shtuar se numri i viktimave mund të rritet ndërsa kërkimet vazhdojnë në zonat e prekura. Viktimat janë nga qarku Bollinger, ku janë raportuar edhe dëme të shumta.
Imazhet nga komuniteti i Glen Allen tregojnë dëme të rënda në shtëpi dhe shtylla elektrike, pemë të shkulura dhe mbeturina të shpërndara nëpër oborre dhe rrugë. Tornado përfshiu Misurin juglindor rreth orës 3:30 të mëngjesit. 11 tornado të tjerë u formuan gjatë natës në shtetet e perëndimit, sipas Shërbimit Kombëtar të Motit të SHBA.
Fundjavën e kaluar, 32 persona humbën jetën si pasojë e tornadove që goditën shtetet e Amerikës së Mesme dhe Jugore. Një javë më parë, një tornado goditi Rolling Fork, Mississippi, duke vrarë 26 njerëz dhe duke rrafshuar shumë nga 400 shtëpitë e qytetit.
Discussion about this post