UEFA Champions League rikthehet sot me takimet e radhës të fazës 1/8 me të apasionuarit e turneut më të rëndësishëm kontinental të futbollit për klube që presin me padurim të zbulojnë se kush do të jenë dy skuadrat e tjera që do të kalojnë në çerekfinale (raund në të cilin janë tashmë, Chelsea dhe Benfica).
Një nga sfidat që pritet me shumë kuriozitet është ajo mes anglezëve të Tottenham dhe 7-herë kampionëve të Europës, AC Milan. Italianët vijnë në këtë duel pas triumfit me rezultatin një me zero në takimin e parë në San Siro.
Skuadra e Piolit do të ketë një detyrë të vështirë në Tottenham Stadium, kjo prej faktit se, londinezët, në shtëpinë e tyre janë tejet të rrezikshëm, të nxitur edhe nga tifozeria e tyre e zjarrtë. Tekniku i lombardëve, pritet ta rreshtojë skuadrën e tij me formacionin 3-4-2-1.
Në portë, do të jetë francezi Maignan, me Kalulu, Thiaw dhe Tomori që pritet të jetë treshja e mbrojtjes.
Katërshja e mesfushës pritet të përbëhet nga lojtarë si Messias, Tonali, Kruniç dhe Theo. Ndërkohë dy trekuartistët do të jenë me shumë gjasa, Rafael Leao dhe Brahim Diaz të cilët do mbështesin sulmuesin e vetëm të deklaruar, që sipas raportimeve pritet të jetë Giroud.
Nga ana tjetër, vendasit e Antonio Conte, pritet të replikojnë formacionin e kundërshtarëve të tyre. Portieri Forster pritet të ketë mbështetjen në mbrojtje të Romero, Sanchez dhe Lenglet.
Emerson, Skipp, Hojberg dhe Perisiç do të jenë në mesfushë, ndërsa reparti i avancuar do të përbëhet nga kapiteni i kombëtares angleze, Harry Kane, i cili do të mbështetet nga trekuartistët, Dejan Kulusevski dhe Hyung-Min Son.
Ky takim është i programuar të startojë në orën 21:00.
Discussion about this post