Përplasja brenda strukturave të LSI në qarkun e Vlorës ngjalli reagime gjatë fushatës për zgjedhjet e 25 prillit, një qark në krye të të cilit ishte Luan Rama. Ky i fundit dha dorëheqjen sot nga të gjitha funksionet në këtë parti pas humbjes në zgjedhje.
Gjatë fushatës zgjedhore, Luan Rama u përfol për përplasje të fortë me Monika Kryemadhin dhe Petrit Vasilin, figurat kryesore të kësaj force politike, ndërsa nuk munguan përplasjet as me Ilir Metën.
Sipas lajmeve që qarkullonin në media në prag të zgjedhjeve, Monika Kryemadhi dhe Petrit Vasili udhëzuan strukturat e LSI-së në Vlorë, që të mos i japin asnjë votë Luan Ramës, por votat të shkojnë për Griselda Myslimin, e renditur e dyta në listë dhe që komandohet më lehtë nga Monika Kryemadhi.
Nga një përgjim që ka rrjedhur nga LSI-ja, kuptohet se Meta dhe Kryemadhi dyshonin te Luan Rama për një afrim me kryeministrin Ramën dhe PS, ndërsa vetë Luan Rama, ka identifikuar disa përfaqësues të LSI, të cilët janë shitur dhe po punojnë për humbjen e LSI.
I pyetur për zërat se ka një përplasje midis tij me LSI-në, Luan Rama në një studio televizive i cilësoi si thashetheme.
“I gjithë parashtrimi është ndërtuar mbi një tymnajë thashethemesh që qarkullon në Vlorë pasi unë jam në detyrë, jam zv/kryetar i LSI dhe në krye të shtabit elektoral në Vlorë. Lista e kandidatëve për deputetë është një proces i gjatë konsultimesh që kam bërë me të gjithë. Janë zgjedhje drejtpërdrejt e imja. Sa për atë që thotë që qenkam afruar me socialistët, nuk e kam fshehur asnjëherë, jam socialist që nga themelimi i PS, jam socialist në një lëvizje socialistësh se jam zëvendës kryetar i LSI dhe nuk kam asnjë inkoherencë në qëndrimet e mia në 30 vite dhe në Vlorë bashkëpunoj dhe do të votohem edhe nga shumë socialistë, këtë nuk e kam fshehur asnjëherë. Një nga arsyet që jam këtu është se socialistët e fyer, të tallur të Vlorës të kenë kë të votojnë se në listën e Rilindjes nuk kanë asnjë”, është shprehur Luan Rama.
Luan Rama ishte në krye të listës së kandidatëve për deputetë në Vlorë, ku nuk arriti të siguronte mandatin e deputetit e për pasojë LSI nuk fitoi asnjë mandat në këtë qytet. Në total LSI siguroi vetëm 4 karrige në parlament.
