Avokatët prej kohësh kanë bojkotuar të gjitha seancat gjyqësore si shenjë protestë ndaj hartës së re gjyqësore të propozuar nga KLGJ. Avokati Denis Mekolli në një intervistë për Ora News, u shpreh se avokatët nuk luftojnë vetëm për veten e tyre por edhe për qytetarët, të cilëve do iu rriten kostot me hartën e re gjyqësore. Ndërkaq, ai theksoi se avokatët rebelë do marrin dënimin e merituar nga Komisioni i Disiplinës.
“Avokatët e Korçës e ushtrojnë këtë veprimtari, po me hartën e re gjyqësore të propozuar nga ana e KLGJ na rezulton se do të mbyllen tre Gjykata në qarkun e Korçës. Kjo do të jetë fatale për të gjithë qarkun Korçë. Qytetarët do të kenë kosto, përfshirë transportin, dokumentet, pagesa për avokatin. Kostoja e qytetarit për të ardhur në Tiranë, minimalisht mund t’i shkojë deri në 100 mijë lekë, për të përfituar 200 mijë lekë të reja. Ka një prishje balancash. Ne sot jemi në një kolaps dhe për shkak të shkarkmit të gjyqtarëve dhe prokurorëve. Edhe sikur të ketë një studim për këtë çështje rezulton se ndarja e gjykatave nuk është kryer nga profesionistë.
Këto raste jo vetëm janë tradhtare por janë sporadike. Jam bindur se të gjithë avokatët të cilën kanë thyer bojkotin do të ndëshkohen nga Komisioni I Disiplinës sipas ligjit për avokatinë, duke iu pezulluar licenca ose duke iu hequr licenca. Qëndrimi i avokatisë është i prerë. Është e drejta jonë të protestojmë për të kërkuar një të drejtë për të cilën ne mendojmë.
Kjo mendoj se nuk përfshin vetëm avokatët, por mendoj se në këtë fushë janë të përfshirë emocionalisht edhe vetë qytetarët e Republikës së Shqipërisë. Kjo nuk është lufta jonë për veten tonë, kjo është lufta jonë për qytetarët.”—u shpreh avokati Denis Mekolli.
Discussion about this post