Trafik armësh, arrestohet në Kolumbi i riu nga Tropoja

Një 33-vjeçar shqiptar është arrestuar nga policia kolumbiane pasi ai ishte shpallur në kërkim ndërkombëtar.

Bëhet fjalë për shtetasin Almir Gjidiaj, i cili akuzohet nga GJKKO si pjesëtar i një organizatë kriminale për trafikim të armëve.

“Në vijim të bashkëpunimit me homologët, për lokalizimin dhe kapjen e shtetasve të shpallur në kërkim ndërkombëtar, bazuar dhe në informacionet e shkëmbyera mes strukturave të Policisë së Shtetit dhe atyre të Kolumbisë, nëpërmjet Interpol Tiranës, në kuadër të operacionit policor “Kartagjena”, është lokalizuar, kapur dhe ndaluar në qytetin e Kartagjenës, nga Policia kolumbiane, shtetasi A. Gj., 33 vjeç, lindur në Tropojë.

Ky shtetas ishte shpallur në kërkim ndërkombëtar, pasi Gjykata e Posaçme Kundër Korrupsionit dhe Krimit të Organizuar, e akuzon si pjesëtar të një organizate kriminale për trafikimin e armëve. Roli i tij kryesor ishte të drejtonte logjistikën dhe transportin për shitjen e armëve të zjarrit me rreze të mesme dhe të gjatë në tregun e zi”, njofton policia shqiptare.

Arrestimi i Gjidiajt u bë me qëllim ekstradimin në vendin tonë.