Njëzet shtetas shqiptarë që kishin mbërritur në Britaninë e Madhe në rrugë ilegale janë depërtuar drejt vendit tonë pasi janë dënuar nga gjykatat angleze me një total prej 46 vitesh burg.
Mes tyre ishte një person i dënuar me 6 vite burg pasi u ndalua me armë në një ambient publik ndërkohë që gjatë kontrolleve policia zbuloi se ai merrej me trafik droge.
Ndërkohë një tjetër person rezulton i dënuar me 3 vite burg për kultivim droge ndërsa një tjetër është dënuar me 5 vite burg.
Sekretarja e Brendshme në Britaninë e Madhe Priti Patel u shpreh se nuk do të ndalen derisa të zbatohen ligjet e shtetit britanik.
“Këta kriminelë kanë shkelur ligjet dhe vlerat tona dhe ne nuk do të ndalemi para asgjëje për të larguar ata që nuk kanë të drejtë të qëndrojnë këtu.
Ata janë përgjegjës për vepra të ndryshme, përfshirë furnizimin me drogë e cila ka një efekt shkatërrues te njerëzit, familjet e tyre dhe komunitetet tona”, u shpreh ajo.
Zyra vendore konfirmoi se gjatë vitit të shkuar 1000 shtetas nga Shqipëria janë larguar nga Britania e Madhe duke përfshirë edhe disa që kishin kaluar ilegalisht kanalin anglez.
Muajin e kaluar 243 persona të huaj të kapur në shkelje të ligjit u depërtuan drejt vendeve të tyre me fluturime çarter dhe të planifikuara.
Ndërkohë javën e kaluar një grup shqiptarësh janë larguar nga Britania e Madhe, përfshirë edhe disa persona të dënuar për vepra të dhunshme, përfshirë këtu rrëmbimin, sulmet me thika dhe armë të tjera.
Në fluturimin e një dite më parë, sipas mediave vendase, janë deportuar edhe dy persona të cilët kishin bërë kërkesë për azil por nuk kishin marrë përgjigje pozitive nga autoritetet dhe një i tretë që kishte shkelur afatin e vizës.
Discussion about this post