Në Fier është konfiskuar një apartament me vlerë 120 000 euro, në pronësi të një 43-vjeçari, Julian Sulo, i dënuar më parë për veprimtari kriminale në fushat e narkotikëve dhe krimeve kundër personit.
Njoftimi i policisë
Vijon puna hetimore për gjurmimin, lokalizimin dhe sekuestrimin e aseteve që janë përfituar nga veprimtari kriminale.
Konfiskohet një apartament me vlerë 120 000 euro, në pronësi të një 43-vjeçari të dënuar më parë për veprimtari kriminale në fushat e narkotikëve dhe krimeve kundër personit.
Nga specialistët e Seksionit për Hetimin e Krimeve të Drejtorisë Vendore të Policisë Fier, u bë ekzekutimi i vendimit të Gjykatës së Apelit Vlorë, për konfiskimin e një apartamenti me vlerë 120 000 euro, në pronësi të shtetasit J. S., 43 vjeç, banues në Lushnjë.
Konfiskimi i apartamentit u bë në vijim të veprimeve të thelluara hetimore dhe procedurale të kryera në kuadër të një procedimi pasuror të iniciuar ndaj 43-vjeçarit.
Apartamenti i konfiskuar dyshohet se është përfituar nga veprimtari kriminale në fushat e narkotikëve dhe krimeve kundër personit, për të cilat shtetasi J. S. ka qenë i dënuar.
Vijojnë hetimet intensive për evidentimin e pasurive të tjera në pronësi të këtij shtetasi dhe të shtetasve të tjerë të lidhur me të.
Kush është Julian Sulo
Ai njihet edhe si “Juli i Pashakos”, ndërsa ka qenë një nga personat e shoqëruar si të dyshuar për masakrën në Lushnje, ku u ekzekutuan Jurgen Hoxha dhe Zamir Latifi, miq të nipit të Aldo Bares, Laert Haxhiut. Sula u vetëdorëzua në polici pas vrasjes së dy të rinjve, por u lirua më pas për mungesë provash.
Në 2016, Julian Sulo u plagos pas ndeshjes Shqipëri-Zvicër në një pikë bastesh, në lagjen “Skënder Libohova”.
Lokali në fjalë ishte në pronësi të Arjan Aliços, i njohur ndryshe si “Arti i Braçes”, një i dënuar më parë për vrasje dhe që njihet si një nga ‘ushtarët’ e Aldo Bares.
Ai u qëllua me thikë rreth 20 herë dhe me leva aq sa u la si i vdekur buzë rruge dhe u shpëtua nga një kalimtar i rastit. Sula nuk përmendi kurrë emrin e ‘ushtarit’ të Aldo Bares si autor, por Arjan Aliçko mori përsipër krimin dhe ndodhet në burg.
Ndërkohë në 2018 Sulos iu sekuestruan edhe 70 mijë euro dhe një makinë superluskoze me vlerë 100 mijë euro.
Discussion about this post