Gjykata e Apelit në Liège, Belgjikë nisi të hënën hetimin e çështjes në gjyqin “Pharmaceutica”, një çështje e madhe e trafikut të drogës, me 18 të pandehur.
Dries Lenneux është shtetasi belg i arrestuar në kuadër të një operacioni të madh antidroge në Belgjikë, të cilit i janë konfiskuar pasuritë nga SPAK.
Ai ishte në një grup me shtetas shqiptar, por në momentin kur prokuroria belge nisi verifikimin e pasurive të tij, ai rezultoi me investime në një vend tjetër e konkretisht në Shqipëri.
Mësohet se dje ka nisur shqyrtimi gjyqësor për këtë person dhe 17 të tjerë. Ai ka folur para trupës së Apelit, ku ka treguar se në fakt nuk ka qenë ai kreu i grupit, por ka qenë një shqiptar.
Shtetasi belg nuk ka mundur dot të flasë me emra për shkak se ai ka frikë për jetën e familjes së tij, që sipas tij, jetojnë në Shqipëri.
Gjykata e Apelit në Liège, Belgjikë, nisi të hënën hetimin e çështjes në gjyqin “Pharmaceutica”, një çështje e madhe e trafikut të drogës, me shumë të pandehur. 18 persona preken nga procedura e ankimit.
Çështja e mbiquajtur “Pharmaceutica” përfshin të pandehur të shumtë dhe ka të bëjë me trafikun ndërkombëtar të lëndëve narkotike. Droga e llojit kokainë, mbërriti nga Kolumbia dhe kalonte transit nëpër portet e Antverp dhe të Roterdam.
Sipas të dhënave të dosjes mësohet se janë sekuestruar jo më pak se 1.9 ton kokainë për një vlerë prej 80 milionë eurosh. Organizata kriminale do të kishte importuar potencialisht 15 tonë kokainë. Droga importohej në laboratorët në Ferrières dhe Modave, ku përpunohej dhe paketohej.
Dries Lenneux, 44- vjeçari, banues në Comblainau-Pont, i konsideruar si vendimmarrës në organizatën kriminale, u dënua me 12 vjet burg. Por ai e kontestoi këtë rol, ndërsa sugjeroi se nuk mund të flasë në detaje për këtë aferë, për shkak të rrezikshmërisë së organizatës.
“Është një organizatë e madhe. Nuk mund të flas për liderin e saj që është shqiptar, ndërsa familja ime jeton në Shqipëri. Kam marrë pjesë në aktivitetet e kësaj organizate, por nuk kam dhënë urdhra apo direktiva. Kam marrë urdhra dhe kam qenë i pranishëm në një rol mbikëqyrës. Misioni im ishte të shikoja dhe të raportoja, por nuk e preka kokainën”, tha ai në gjykatë.
Dries Lenneux pohoi se hetimi ishte kryer ekskluzivisht kundër tij dhe se detyrat shtesë që do të bënin të mundur kualifikimin e rolit që i atribuoheshin atij i ishin refuzuar. Ai pretendon se ka qenë në dijeni të seriozitetit të fakteve, por kërkon një dënim më të vogël për rolin e tij si mbikëqyrës. Për këtë shtetas më herët SPAK ka sekuestruar edhe disa pasuri që kishte në Shqipëri.
Pasuritë e seksuestruara të Dries Lonneux janë si më poshtë:
1. Pasuria me sipërfaqe 122.8 m2, ndodhur në Sarandë, e llojit “Apartament”, përfituar me kontratë shitje për shumën prej 45 000 Euro;
2. Pasuria me sipërfaqe 72.90 m2, ndodhur në Sarandë, e llojit “Apartament”, blerë nga shtetasi belg Dries Lonneux për shumën monetare prej 25 000 Euro;
3. Pasuria me sipërfaqe 108 m2, ndodhur në Sarandë, e llojit “Apartament”, blerë nga shtetasi belg Dries Lonneux për shumën monetare prej 35 000 Euro;
4. Pasuria me sipërfaqe 115 m2, ndodhur në Sarandë, e llojit “Apartament”, blerë nga shtetasi belg Dries Lonneux, për shumën monetare prej 35 000 Euro;
5. Pasuria me sipërfaqe 58.80 m2, ndodhur në Sarandë, e llojit “Apartament”, blerë nga shtetasi belg Dries Lonneux, për shumën monetare prej 25 000 Euro;
6. Pasuria e ndodhur në Tiranë, e llojit “Arë + truall”, me sipërfaqe 5 150 m2 nga të cilat 849 m2 truall dhe 283 m2 ndërtesë, në pronësi të shoqërisë “Ralet Green” shpk., përfituar me kontratë shitje nga Shoqëria “Ralet Green” shpk, përfaqësuar nga administratori Dries Lonnuex për shumën prej 250 000 Euro;
7. Pasuria me sipërfaqe 550 m2, e ndodhur në Tiranë, e llojit “Arë”, në pronësi të shoqërisë “Ralet Green” shpk;
8. Pasuria me sipërfaqe 2 890 m2, e ndodhur në Tiranë, e llojit “Arë”, në pronësi të shoqërisë “Ralet Green” shpk;
9. Pasuria me sipërfaqe 1 180 m2, e ndodhur në Tiranë, e llojit “Arë”, në pronësi të shoqërisë “Ralet Green” shpk;
10. Pasuria me sipërfaqe 1 900 m2, e ndodhur në Tiranë, e llojit “Arë”, në pronësi të shoqërisë “Ralet Green” shpk;
Discussion about this post