Goditet trafikimi i emigrantëve në Elbasan, arrestohen 3 persona

Tre persona kanë rënë në prangat e Policisë në Elbasan, pasi u kapën duke transportuar 24 emigrantë të paligjshëm nga vendet e treta.

Sipas uniformave blu, emigrantët do të ndihmoheshin të kalonin ilegalisht drejt vendeve të Bashkimit Europian.

Në pranga është vënë shtetasi F. M., 22 vjeç, banues në Elbasan, i cili u kap duke transportuar 14 emigrantë të paligjshëm.

Po ashtu janë vënë në pranga A. R., 23 vjeç dhe D. Ç., 24 vjeç, të dy banues në Përrenjas, të cilët po transportonin 10 emigrantë. Nga verifikimet rezultoi se A. R. drejtonte automjetin edhe pa leje drejtimi.

Policia sekuestroi dy automjetet e përdorura për transportin e emigrantëve, ndërsa materialet procedurale i kaluan Prokurorisë së Elbasanit për veprime të mëtejshme.