Trafikonin armë nga Kosova në Shqipëri, Gjykata e Tiranës lë në qeli 8 të arrestuarit

Gjykata e Tiranës ka vendosur masën e sigurimit “arrest në burg” për 8 të arrestuarit në lidhje me akuzat për shitblerje armësh. Trupa gjykuese pranoi kërkesën e Prokurorisë së Tiranës, ndërsa të gjithë të dyshuarit do të qëndrojnë në qeli.

Në listën e të arrestuarve janë: Emirel Tusha, Leandro Haxhiaj, Fabricio Berberi, Rikardo Hajdaraj, Visar Murati, Kevin Farruku, Geraldo Muraj dhe Adriano Shehu. Asnjë prej tyre nuk deklaroi asgjë para gjykatës.

Mbrojtja ka ngritur pretendime se arrestimet janë kryer në kundërshtim me ligjin, duke argumentuar se policia po përdor blerjet e stimuluara për të nxitur veprime të kundraligjshme. Avokatët kërkuan prova konkrete dhe ekspertiza për secilin të dyshuar, si dhe vërtetimin e funksionalitetit të armëve të sekuestruara. Ata kërkuan që arrestimi të cilësohej i paligjshëm, duke vënë në dukje mungesën e precedentëve penalë për klientët e tyre.

Nga ana tjetër, Prokuroria paraqiti ekspertizat e armëve të kapura më parë gjatë ndalimit të Altin Pajazitit dhe Kadri Prushit, ku njëra armë rezultoi jashtë funksionit.

Operacioni i policisë rezultoi me sekuestrimin e 14 armëve të zjarrit, përfshirë 12 pistoleta – njëri me silenciator, dhe 2 automatikë, si dhe 2077 fara cannabis, krehra, municion luftarak, 3 automjete dhe 8 celularë.

Nga hetimet ka rezultuar se të pjesëtarët e këtij grupi, siguronin armë në Kosovë dhe në qytete të ndryshme të Shqipërisë dhe i shisnin në Tiranë.

“Në kuadër të operacionit bazuar në informacionet e siguruara nga hetimi për disa shtetas që dyshohej se trafikonin armë zjarri, kryesisht nga Kosova në Tiranë, me qëllim shitjen, janë vënë në pranga shtetasit: E. T., 32 vjeç, L. H., 21 vjeç, F. B., 26 vjeç, R. H., 21 vjeç, V. M., 23 vjeç, K. F., 18 vjeç, G. M., 22 vjeç dhe A. Sh., 23 vjeç. Gjithashtu, u shpallën në kërkim shtetasit R. K., 41 vjeç dhe A. N., 24 vjeç.

Nga hetimet dyshohet se këta shtetas, pasi siguronin armë zjarri  kryesisht në Kosovë por dhe në qytete të ndryshme të Shqipërisë, i sillnin ato në Tiranë, për t’i shitur.    

Gjatë periudhës hetimore, në kuadër të këtij procedimi, më datë 01.04.2025, janë ndaluar shtetasit A. P dhe K. P., pasi u kapën në flagrancë me 2 armë zjarri, të dyshuara të trafikuara nga Kosova, me qëllim shitjen në Tiranë.

gijotina.com/