Dy shqiptarë të Kosovës janë arrestuar në Dhërmi nga policia, që ka sekuestruar një sasi droge. Sipas bluve, dy kosovarët shisnin drogë në zonë.
Aksioni i koduar “Room 3”, që erdhi “bazuar në informacionet e siguruara në rrugë operative nga burime të ndryshme”, siç bën me dije policia, çoi në pranga dy persona: T.T., 31 vjeç dhe E. K., 25 vjeç, banues të dy në Prishtinë, Kosovë.
Ata akuzohen për veprën penale “Prodhimi dhe shitja e narkotikëve”, e kryer në bashkëpunim.
Lidhur me ngjarjen bëhet me dije se gjatë kontrollit të ushtruar në automjetin tip “Toyota” me të cilin qarkullonin këta dy shtetas dhe gjatë kontrollit të dhomës në të cilën ishin akomoduar, në Dhërmi, u gjetën dhe u sekuestruan 87 doza me lëndë të dyshuar narkotike MDMA, 522 tableta të dyshuara ecstasy, rreth 80 doza me lëndë të dyshuar narkotike kokainë, 19 doza me kërpudha haluçinogjene, lëndë narkotike e dyshuar kanabis në formë çokollate dhe në formë boçeje, 2 aparate celulare, një peshore elektronike dhe një sasi e dyshuar e përfituar nga shitja e lëndëve narkotike.
Së fundmi, nga veprimet hetimore ka rezultuar se këta dy shtetas u shisnin lëndë narkotike personave të ndryshëm, përdorues të lëndëve narkotike, në zonën e Dhërmiut, kryesisht në lokalet e natës.
Materialet i kaluan Prokurorisë pranë Gjykatës së Shkallës së Parë Vlorë, për veprime të mëtejshme, për veprën penale “Prodhimi dhe shitja e narkotikëve”, e kryer në bashkëpunim.
Discussion about this post