Policia e Kukësit ka finalizuar operacionin e koduar “Morina”, ku në 24 orët e fundit janë goditur katër raste të tentativës për dhënie ndihme për kalim të paligjshëm të kufirit, emigrantëve nga vendet e treta.
Sipas bluve të Kukësit, janë vënë në pranga Destan Arifaj, banues në Prishtinë, Ervin Dorzi, banues në Tiranë, Edison Dorzi dhe Erion Tumani, banues po në Tiranë. Ata u arrestuan pasi u kapën nga shërbimet e Policisë, në hyrje të Tunelit të Kalimashit dhe në afërsi të Morinës, në tentativë për të transportuar me makinë 46 emigrantë të paligjshëm, për t’i kaluar në mënyrë të paligjshme drejt Kosovës, kundrejt fitimit deri në 500 euro për person.
Policia njofton se gjatë muajit nëntor janë goditur 17 raste të kësaj veprimtarie kriminale, ku janë arrestuar 16 persona dhe janë proceduar në gjendje të lirë 2 të tjerë.
Në cilësinë e provës materiale u sekuestruan automjetet që përdoreshin për të transportuar emigrantët, vlera monetare dhe celularë.
Discussion about this post