Trafiku i armëve drejt Britanisë, 3 të arrestuar në Tiranë. Kush ishte “koka”

Tre persona janë arrestuar, ndërsa tre të tjerë janë shpallur në kërkim, të akuzuar si pjesë e një grupi që trafikonte armë nga Shqipëria drejt Britanisë.

Në pranga u vunë Adulla Hoxhaj, 44 vjeç, Bojken Turtulli, 21 vjeç, Rifat Avdiaj, 62 vjeç, të tre banues në Tiranë, ku dhe u arrestuan. Ndërsa tre të shpallurit në kërkim dyshohet fshihen në Mbretërinë e Bashkuar. Për të gjashtë të dyshuarit është caktuar masa e sigurisë arrest në burg nga GJKKO, me kërkesë të Prokurorisë së Posaçme.

Aksioni

Në një njoftim zyrtar, Policia bëri me dije aksioni i koduar “Inkorporimi”, u zhvillua nga Drejtoria e Krimit të Organizuar dhe Drejtoria e Forcës së Posaçme Operacionale në Departamentin e Policisë Kriminale në Policinë e Shtetit, me mbështetjen e Drejtorisë Vendore të Policisë Tiranë dhe të Komisariatit të Policisë Tropojë, në bashkëpunim me SPAK-un, BKH-në dhe autoritetet ligjzbatuese britanike.

Gjatë operacionit u godit një grup kriminal që trafikonte armë zjarri nga Shqipëria drejt Mbretërisë së Bashkuar, shtuan të njëjtat burime, ndërsa u sekuestruan  një arsenal armësh i përbërë nga 25 armë zjarri (24 pistoleta dhe 1 kallashnikov), qindra fishekë, lazera që i montohen armëve speciale dhe shërbejnë për qitje në distancë, dhe pajisje optike. Po ashtu janë sekuestruar dhe veshje kamuflazhi si ato të forcave speciale, 4 automjete, 8 celularë, karta SIM, 2 laptopë dhe 2 armë të ftohta (thika).

Arsenali i armëve dhe sendet e tjera të sekuestruara janë gjetur në banesën e shtetasit Adulla Hoxhaj, i cili nga hetimi rezulton drejtuesi i grupit kriminal.

Gjatë operacionit janë ushtruar kontrolle në 6 banesa, në Tiranë dhe në Tropojë.

Operacioni vjen në kuadër të procedimit të iniciuar në muajin prill të vitit 2023, nga Drejtoria e Krimit të Organizuar në Policinë e Shtetit dhe Drejtoria Vendore e Policisë Durrës, thotë policia dhe është ndjekur me metoda proaktive.

“Në muajin prill 2023, Policia, mbi bazën e informacioneve të marra në rrugë operative, sekuestroi në Portin e Durrësit, një tjetër arsenal armesh (8 pistoleta) që do trafikoheshin drejt Mbretërisë së Bashkuar, me një furgon me targa angleze, drejtuesi i të cilit u vu në pranga”, thuhet në njoftimin e bluve, që shtojnë se hetimet për rastin vijojnë.